Spennandi götuhjólamót framundan

Götuhjólamótið RB Classic fer fram laugardaginn 27. ágúst þar sem hjólað er í kringum Þingvallavatn.Búist er við metþátttöku í ár en vinsældir mótsins hafa aukist mikið frá því það var fyrst haldið árið 2014.

Skráningarfrestur rennur út á miðnætti í dag, miðvikudaginn 24. ágúst. Hægt er að skrá sig hér.

Keppt verður í tveimur vegalengdum á RB Classic; A flokki sem er tveir hringir og um 127 km löng leið og í B flokki sem er um 65 km löng leið og einn hringur kringum vatnið.

Sigurvegari síðasta árs í A flokki var Óskar Ómarsson en hann er eftir að ákveða hvort hann keppi næstu helgi. Hann segir mótið í fyrra hafa verið einstaka upplifun. „Keppnin í fyrra tókst með eindæmum vel og var framkvæmd og umgjörð til mikillar fyrirmyndar. Uppáhaldið mitt við þessa keppni er án vafa malarkaflinn. Slíkir kaflar eru vanmetnir hér á landi í keppnum á götuhjólum, kannski vegna þess hve götuhjólreiðar eiga sér stutta sögu á Íslandi, en erlendis eiga þær sér mun lengri sögu en t.d. malbikaðir vegir.“

Óskar hefur hjólað meira og minna alla ævi en það var þó ekki fyrr en í byrjun árs 2012 að hann byrjaði að æfa að einhverju viti. „Fljótlega var ég kominn á fullt á götuhjólinu. Ég hef ekki tekið neina stóra titla enn sem komið er en hef náð nokkrum sætum sigrum á götuhjólinu í ár og í fyrra.“

Það er RB sem heldur mótið í samstarfi við hjólreiðafélagið Tind og hjólaverslunina Kríu.

Allar nánari upplýsingar og RB Classic og skráningarform má nálgast á www.rb.is/rb-classic.