Sigurður Einarsson: Al Thani enginn huldumaður

Sigurður Einarsson, fyrrverandi stjórnarformaður í Kaupþing, sér ástæðu til að leggja út af þeim fregnum að Al Thani-fjölskyldan hafi nú nýverið aukið hlut sinn í Deutsche Bank verulega.

Ekki um nein sýndarviðskipti að ræða

Sigurður krækir í frétt um málið á Facebooksíðu sinni og setur þá í samhengi við dómsmál sem að Sigurði sjálfum snéru og Al Thani blandaðist inní. Sigurður telur að glæpurinn sá og hvernig Al Thani-málinu var blandað inní það, hafi verið heimatilbúinn skáldskapur seðlabankastjóra sem hann matreiddi ofan í Sérstakan saksóknara í þeim tilgangi að beina athygli frá sér sjálfum og koma bankamönnum í fangelsi. Sem og varð raunin í tilfelli Sigurðar og fleiri Kaupþingsmanna.

„Hans hátign Al Thani keypti 5,01% hlut í Kaupþingi 22. september árið 2008. Eftir að bankinn féll var því haldið fram að um sýndarviðskipti hefði verið að ræða. Embætti sérstaks saksóknara tók til starfa árið 2009 og starfsmenn þess gáfu í skyn að Al Thani væri spunapersóna eða huldumaður. Það er auðvitað fjarstæðukennd hugmynd að konungsfjölskyldan í Katar láni nafn sitt í sýndarviðskipum og enn óskiljanlegra að menn hafi verið dæmdir í fangelsi á þeim forsendum,“ skrifar Sigurður á Facebooksíðu sína.

Vitleysan matreidd af seðlabankastjóra í Sérstakan

Sigurður bendir þá á að Al Thani hafi staðfest sjálfur, í yfirheyrslu Sérstaks saksóknara að „viðskiptin með bréfin í Kaupþingi hefðu verið raunveruleg.

Al Thani er greinilega ekki af baki dottinn þegar kemur að viðskiptum í fjármálafyrirtækjum. Al Thani fjölskyldan orðin stærsti hluthafinn í Deutsche Bank sem hefur verið ein öflugasta fjármálastofnun heims, en Al Thani fjölskyldan er ein sú ríkasta í heiminum.“

Sigurður hefur þetta til marks um hversu afvegaleidd umræðan var hér eftir hrun. „Það átti bara að finna einhvern glæp og í Al Thani málinu var glæpurinn heimatilbúinn skáldskapur seðlabankastjóra sem hann matreiddu ofan í Sérstakan saksóknara í þeim tilgangi að beina athyglinni frá sér sjálfum og koma bankamönnum í fangelsi.“

Al Thani-fjölskyldan orðin stærsti hluthafinn

Fréttin sem Sigurður leggur út af snýst um það að katarska konungsfjölskyldan Al Thani sé orðin stærsti hluthafinn í þýska bankanum Deutsche Bank, einum stærsta banka heims. Financial Times greinir frá því að Al Thani fjölskyldan eigi nú nærri tíu prósenta hlut í bankanum.

Konungsfjölskyldan keypti upprunalega hlut í bankanum árið 2014 í gegnum fjárfestingasjóðina Paramount Services Holdings og Supreme Universal Holdings. Hlutur fjölskyldunnar 6,1 prósenti í ágúst síðastliðnum. Konungsfjölskyldan hefur nú tekið fram úr eignarstýringarfyrirtækinu Black Rock sem stærsti hluthafinn, en ekki er gefið upp hvenær hlutafjárkaupin fóru fram eða hve mikið var greitt fyrir hlutabréfin.

Hlutabréfaverð í Deutsche Bank hefur hrunið

Hlutabréfaverð í Deutsche Bank hefur fallið um helming síðasta árið og hafði aldrei verið lægra í síðustu viku. Talið er að fjölskyldan vilji fá sinn eigin mann í stjórn félagsins.

Mikla athygli vakti þegar tilkynnt var að einn meðlimur fjölskyldunnar, Mohammed Bin Khalifa Al-Thani, hefði keypt 5,01 prósenta hlut í Kaupþingi í september 2008. Kaupþing lánaði fyrir hlutabréfakaupunum en fyrrum stjórnendur Kaupþings og Ólafur Ólafsson fjárfestir fengu þunga fangelsisdóma vegna aðkomu sína að viðskiptunum.