Tapa Eyjamenn sjötta árið í röð í síðasta leik fyrir Þjóðhátíð?

Síðasti fótboltaleikurinn fyrir Verslunarmannahelgi fer fram í Eyjum í kvöld þegar Eyjamenn taka á móti Íslandsmeisturum FH í undanúrslitum Borgunarbikars karla. Í boði er sæti í bikarúrslitaleiknum á móti Val.

Leikurinn fer fram á Hásteinsvellinum, rétt við Herjólfsdalinn, þar sem Þjóðhátíð verður síðan haldin að venju á næstu dögum. Leikur ÍBV og FH hefst klukkan 18.00 og verður í beinni útsendingu á Stöð 2 Sport.

Það er athyglisvert að skoða gengi Eyjamanna í síðasta leik liðsins fyrir Þjóðhátíð undanfarin tímabil en það hafa ekki verið alltof kátir fótboltamenn úr ÍBV-liðinu sem hafa mætt í Dalinn á síðustu Verslunarmannahelgum.

Eyjamenn hafa nefnilega tapað síðasta leik fyrir Þjóðhátíð undanfarin fimm ár og þar af hafa Vestmannaeyingar dottið út úr bikarnum við þessar aðstæður undanfarin tvö ár. KR sló ÍBV út bikarnum í undanúrslitaleik á KR-velli 2015 og sló ÍBV út úr undanúrslitum bikarsins á Hásteinsvellinum 2014.

Sumarið 2013 töpuðu Eyjamenn bæði síðasta leik fyrir Þjóðhátíð sem og leik á móti FH sem fór fram á miðri Þjóðhátíð. Liðið tapaði líka síðasta leik sínum fyrir Verslunarmannahelgina 2011 og 2012.

Eyjamenn mættu síðast sigurreifir inn á Þjóðhátíðina árið 2010 eða fyrir sex árum síðan. ÍBV-liðið vann þá 3-1 sigur á Val 25. júlí eða á sunnudaginn fyrir Þjóðhátíð.

Tryggvi Guðmundsson skoraði tvö mörk í leiknum og Danien Justin Warlem jafnaði áður metin í 1-1 eftir að Valsmenn höfðu komist yfir strax á 9. mínútu.

Þjálfari Eyjamann í þessum leik var Heimir Hallgrímsson en undir hans stjórn vann ÍBV-liðið síðasta leik sinn fyrir Þjóðhátíð tvö ár í röð frá 2009 til 2010. Það eru einu sigrar liðsins í þessum lokaleik fyrir Verslunarmannahelgina undanfarin áratug.

Síðasti leikur ÍBV fyrir Þjóðhátíð síðasta áratug:

2015

4-1 fyrir KR í bikar

2014

5-2 fyrir KR í bikar

2013

3-1 tap fyrir Blikum í deild

og

2-1 tap fyrir FH í deild á Þjóðhátíð (laugardagur)

2012

1-0 tap fyrir Blikum í deild

2011

2-0 tap fyrir Þór Akureyri í deild

2010

3-1 sigur á Val í deild

2009

1-0 sigur á Stjörnunni í deild

2008

1-0 tap fyrir Stjörnunni í deild (B-deild)

2007

0-0 jafntefli við Fjarðabyggð í deild (B-deild)

2006

5-0 tap fyrir Val í deild