Del Bosque hættur með Spán

Vicente er hættur sem þjálfari spænska landsliðsins í knattspyrnu, en hann staðfesti þetta við þarlenda útvarpsstöð.

Spánverjar duttu út í 16-liða úrslitunum gegn Ítalíu, en Del Bosque varð heimsmeistari með Spáni 2010 og Evrópumeistari 2012.

„Ég hef engin áform um að halda áfram sem þjálfari. Úrslitin á EM skiptu ekki máli. Ég var aldrei í vafa um hver framtíð mín yrði," sagði hann við Radiogaceta Sports.

Hann bauðst til að segja af sér eftir að Spánverjar komust ekki upp úr riðlinum á HM 2014, en hélt áfram að lokum.

Spánverjar unnu fyrstu tvo leikina á EM, gegn Tékklandi og Tyrklandi, en töpuðu svo gegn Króötum í síðasta leik riðilsins.

Allar líkur eru á því að hinn 65 ára gamli þjálfari sé nú hættur sem þjálfari, en hann vann meðal annars tvo Evrópubikara með Real Madrid áður en hann tók við Spáni.