Upp fyrir Wales á síðasta kvöldinu

Ísland er ein af fimm þjóðum sem eru á leiðinni á sitt fyrsta Evrópumót karla í fótbolta. Þegar Ísland hefur leik eftir fimm daga hafa Wales, Albanía, Slóv­akía og Norður-Írland öll spilað sinn fyrsta leik í úrslitakeppni EM.

Ísland verður því sá nýliði sem hefur þurft að bíða lengst eftir að spila á EM frá því að sætið var tryggt. Þegar strákarnir ganga út á völlinn í Saint-Étienne verða liðnir 282 dagar frá sunnudagskvöldinu í Laugardalnum þegar stig á móti Kasakstan skilaði Íslandi inn á EM.

Íslenska landsliðið hefur spilað ellefu landsleiki á þessum tíma eða landsleik á 26 daga fresti. Hinar þjóðirnar hafa einnig spilað fullt af landsleikjum á þessum dögum milli þess að sætið var tryggt og að EM hefst. Það er fróðlegt að bera saman árangur nýliðanna fimm frá stóra deginum. Allir voru þeir að upplifa stóra stund í knattspyrnusögu sinnar þjóðar.

Ekki afsökun en hluti af skýringu

Lars Lagerbäck og Heimir Hallgrímsson hafa verið að duglegir að prófa ýmsa leikmenn og Ísland hefur aldrei byrjað með það lið sem er líklegast til að ganga út á völlinn á móti Portúgal. Það er ekki afsökun en hluti af skýringunni á því að Ísland hefur tapað jafn mörgum leikjum og raunin er. Það þarf ekki að koma á óvart að Ísland sé neðarlega á listanum yfir árangur þjóðanna í þessum leikjum.

Sigurinn á Liechtenstein á mánudagskvöldið sá hins vegar til þess að Ísland rekur ekki lestina. Það kemur í hlut Gareths Bale og félaga í velska landsliðinu. Ísland vann lokaleikinn sinn en Wales tapaði aftur á móti tveimur síðustu leikjum sínum og hefur ekki unnuð leik síðan liðið vann Andorra 2-0 í október.

Alltof mörg mörk á sig

Ísland er kannski í 4. sæti yfir árangur en liðið er aftur á móti í neðsta sæti þegar kemur að mörkum fengnum á sig. Ísland hefur fengið á sig tvö mörk að meðaltali í leik í þessum ellefu leikjum.

Allt aðra sögu er að segja af liðum Slóvakíu og Norður-Írlands en hvorugt þeirra hefur tapað leik síðan þau tryggðu sig inn á EM. Slóvakar eru með aðeins betri árangur og meðal liða sem þeir hafa unnið er Ísland og heimsmeistarar Þýskalands. Það vill svo til að Slóvakar mæta Wales í fyrsta leik sínum á laugardaginn, liðið með besta árangurinn á móti liðinu með þann versta.

Strákarnir hafa lofað íslensku þjóðinni að mæta til leiks á EM eins og liðið í undankeppninni en ekki liðið í vináttulandsleikjunum. Nú er bara að vona að strákarnir geti staðið við það og við sjáum aftur liðið sem vann Tékka og Hollendinga á síðasta ári.