Wolff: Mercedes má ekkert misstíga sig í heimsmeistarakeppninni

Toto Wolff, liðsstjóri Mercedes liðsis í Formúlu 1 segir að liðið megi ekkert misstíga sig í baráttunni um sinn þriðja heimsmeistaratitil í röð.

Max Verstappen vann spænska kappaksturinn á Red Bull bílnum eftir að Mercedes ökumennirnir lentu saman og þurftu að hætta keppni.

Lukkan ein færði Mercedes sigur gegn Red Bull í Mónkó. Red Bull klúðraði þjónustuhléi sem kostaði Daniel Ricciardo allt að því örugglega unna keppni.

Mercedes bíllinn er að öllum likindum sá bestin á heildina litið. Wolff hefur þó auknar áhyggjur af keppinautunum og þá sérstaklega Red Bull.

„Mónakókeppnin bauð upp á blendnar tilfinningar. Lewis [Hamilton] gerði það sem von var á [hann vann]. Það þurfti mjög kjarkmikla keppnisáætlun til að láta það takast og stóra sneið af heppni í kringum þjónustuhlé Daniel [Ricciardo] til að okkur tækist að vinna,“ sagði Wolff.

„Ég hef sagt þetta oft áður en við megum ekkert misstíga okkur í þessari heimsmeistarakeppni. Það er stöðug barátta að halda hverslags forskoti sem við höfum við. Pressan eykst bara og eykst,“ hélt Wolff áfram.

„Þetta óútreiknanlega tímabil hefur verið afar gott fyrir Formúlu 1 sem íþrótt og sýnir að hún er lifandi og líður vel. Fyrir okkur sem lið hins vegar er greinilega margt að laga. Við getum enn bætt áreiðanleika okkar en áherslan á meira afl er að verða stöðugt mikilvægari líka,“ sagði Wolff að lokum.