Hljómsveitin GlowRVK frumsýnir nýtt myndband

Það má svo sannarlega segja að GlowRVK komi fólki í sumarfíling með lagi sínu We Are The Animals og myndbandi við lagið. Sumarnóttin er í forgrunni í myndbandinu sem er tekið upp á íslenskri strönd eða við Gróttu á Seltjarnarnesi.

Mikil stemming myndaðist þegar myndbandið var tekið upp enda logaði varðeldur þegar sólin settist og eldgleypir lék listir sínar. Lagið fjallar um að hreinsa hugann og sleppa af sér beislinu. Eldurinn innra með hverjum og einum á að taka völdin, styrkja, veita hugarró og bægja burt öllum ótta og kvíða.

GlowRVK er nýlegt Electro tvíeyki frá Reykjavík. Bjarni Freyr Pétursson og Sylvía Björgvinsdóttir skipa hljómasveitina. Þau hafa verið að vinna saman í ár og spila víða GlowRVK er þessa dagana að vinna að sinni fyrstu plötu í fullri lengd og til stendur að hún verði tilbúin í ágúst. Vinnuheitið er Unity.

Rauði þráðurinn í laginu er hversu mikilvægt sé að við stöndum öll saman hvaðan sem við komum. Hvar sem við búum og hvað sem við gerum þá getum við öll sameinast í tónlistinni og fundið frið og hamingju.

GlowRVK vinna danstónlist sem þau kalla LimboHouse. Hún er undir áhrifum frá mörgum af stærri House- og raftónlistarstefnum. Nafn stefnunnar stendur fyrir það hversu margar tónlistarstefnur tengjast henni. Tilgangur tónlistar GlowRVK er í raun einfaldur það er að fá fólk til að finna gleðina og dansa.