Gera hlutina ávallt eftir sínu höfði

Hljómsveitin Quarashi er 20 ára á þessu ári og er með ýmislegt planað til að fagna þeim tímamótum. Sveitin er í tökum á stóru myndbandi við nýtt lag, spilar á Þjóðhátíð og hefur verið að laumast í hljóðverið til að taka upp ný lög.

Fréttablaðið heyrði hljóðið í þeim Sölva Blöndal og Steinari Fjeldsted þar sem þeir voru á milli taka á myndbandi við nýja lagið sem þeir vildu ekki ljóstra upp titlinum á og ræddi við þá um árin tuttugu, hvernig tónlistin hefur þróast og endurkomu Höskuldar Ólafssonar eða Hössa.

„Það er svolítið erfitt að hætta þessu, við höfum allir verið félagar og tölum mismikið saman á mismunandi tímabilum en við höldum alltaf hópinn. Ég og Sölvi höfum verið að kasta lögum á milli – hann sendir mér nýtt stöff sem hann er að hlusta á og ég sendi honum nýtt stöff sem ég er að hlusta á. Það er ekkert algjörlega út úr kú að við séum að koma aftur núna og kannski ekkert eingöngu út af því að það er 20 ára afmæli, það er samt svona rúsína í pylsuendanum,“ segir Steinar um ástæðu endurkomu Quarashi og hvort hún hafi verið plönuð lengi.

Úr Hafnarstræti til L.A.

Hljómsveitin Quarashi var stofnuð sumarið 1996 í bílskúr í vesturbænum annars vegar og niðurníddu partíhúsnæði í Hafnarstræti hins vegar. Upprunalegu meðlimirnir voru Steini, Sölvi og Hössi en í gegnum árin hefur Quarashi gengið í gegnum nokkrar mannabreytingar.

„Við vorum báðir að vinna í skeitparki og byrjuðum að „partía“ saman á hverjum degi. Og þá vorum við mikið að hlusta á tónlist. Ég man eftir þessu, við vorum niðri í Hafnarstræti, báðir rosalega hressir og við sögðum: „Við þurfum að gera tónlist,“ og Sölvi sagði: „Ég er með „beats“, hittumst uppi í skúr hjá mér á morgun,“ og ég sagði: „Ókei, ég kem með texta,“ og við hittumst daginn eftir og Switchstance varð til. Þetta var „móment“,“ segir Steinar en gamalt myndband við lagið má sjá hér fyrir neðan.

„Það besta við svona „móment“ er að maður hefur ekki hugmynd um að þetta séu svona „life defining moment“. Stór „móment“ eru oft þannig, þú veist ekkert að þau eru stór „móment“ meðan þau gerast. Við vissum ekkert að nokkrum árum síðar myndum við vera staddir í L.A. í stúdíóinu með Cypress Hill.“

Af gamla skólanum

„Þetta lag er með mikið af vísunum í „the old school“ því að við erum rosa mikið þar – við erum bara „old school“,“ segir Sölvi aðspurður að því hvernig nýja lagið komi til með að hljóma.

„Við erum bara að gera okkar stöff, okkur er alveg sama hvað er í gangi hverju sinni, við erum ekki að reyna að „sánda“ eins og allir hinir. Við erum ekki að reyna að rappa eins og allir hinir. Við erum bara Quarashi og gerum okkar stöff,“ tekur Steini undir.

„Við erum með okkar sögu. Það er stundum þungt að vera með svona sögu – fólk er með skoðun á því sem kemur út, „er þetta betra en það var eða verra en það var“. Þá ertu ekki með þetta „fresh approach“. Við höfum líka orðið fyrir innblæstri af því sem er að gerast, hiphopið er að fara í gegnum blómaskeið. Sem betur fer erum við svo heppnir að hafa átt hlut í því að byrja það. Við keyrðum þetta áfram – við erum fyrsta íslenska rapphljómsveitin, án þess að hafa planað það. Við erum Quarashi og fólk þekkir sándið þegar það heyrir það. Það er bara þannig.

Við ætlum að sjá hvernig viðbrögðin verða við þessu og síðan sjáum við bara til. Það eru aðrir sem eru að stýra senunni núna, sem betur fer og við erum bara að gera okkar dót. Við erum bara svolítið að horfa á þá sem eru að gera stöff núna og dást að þeim. Við bara ætlum að henda okkar tveimur sentum inn í þetta núna,“ segir Sölvi aðspurður hvort þeir stefni á að gefa út fleiri ný lög, jafnvel nýja plötu.

Hér fyrir neðan má sjá myndband við lagið Malone Lives af plötunni Jinx frá árinu 2002.

Endurkoma Hössa í Quarashi

„Þetta sem við erum að gera í dag hefði aldrei gengið upp nema að við værum allir með. Þá er ég að tala um Hössa líka.“

„Stjörnurnar höguðu því þannig að orgínal lænöppið var bara „up and running“ og „game“ í þetta. Hössi var í fíling og byrjaði að syngja nokkra parta í tveimur lögum og síðan byrjuðum við að stinga að honum hvort það væri ekki sniðugt ef hann prófaði að rappa, sem hann hefur ekki gert í fjórtán ár – síðan 2002.“

„En það er eins og hann hafi aldrei hætt“

„Þetta var söguleg stund í stúdíóinu þegar hann byrjaði að rappa.“

„Þú gast heyrt saumnál detta á meðan.“

„Við vorum alveg „sjitt maður, getur hann ennþá rappað?“ en já, hann alveg „killaði“ þetta.“

Quarashi verða að spila á Þjóðhátíð í sumar og stefna á að gefa út myndband í næstu viku við nýja lagið sitt þar sem allir meðlimir bandsins munu koma við sögu. Þar verður öllu tjaldað til og má búast við miklu sjónarspili þar sem Hössi lagði líf sitt í hættu upp á þakinu á Höfðatorgi og bankaútibú var fengið að láni, svo að eitthvað sé nefnt.