Eitt glæsilegasta einbýlishús landsins til sölu í Garðabæ - Myndir

Fasteignasalan Smárinn er með stórglæsilegt einbýli til sölu í Akrahverfinu í Garðabæ en eignin er samtals um 400 fermetrar.

Í húsinu er mikil lofthæð og öll hönnun og skipulag hið glæsilegasta. Húsið er átta herbergja en í dag eru þar þrjú svefnherbergi.

Eldhúsið er flísalagt með sérsmíðaðri innréttingu frá Stíganda, gler milli efri og neðri skápa, gott skápapláss og vönduð tæki. Sjónvarpskrókur er innaf eldhúsi og er hann flísalagður en rýmið má einnig nýta sem borðkrók.

Stofan er parketlögð og opin að hluta með fallegum gasarni og mikilli lofthæð. Í húsinu er glæsilegt fataherbergi sem er parketlagt og með góðum skápum. Innangengt úr fataherbergi upp á gott geymsluloft með fellistiga.

Bílskúrinn er sérstaklega glæsilegur og rúmgóður. Hann er með mikilli lofthæð og bílalyftu. Í honum eru tvær stórar rafdrifnar innkeyrsluhurðar og ein gönguhurð austanmegin. Úr bílskúr er stigi niður í kjallara sem er í dag nýttur sem tómstundarrými með biljarðborði.

Húsið er einkar bjart og rúmgott með mikilli lofthæð og vönduðum hljóðvistarplötum í lofti. Bose hátalarakerfi og innbyggð lýsing í lofti og veggjum, næturlýsing.

Garður umhirðulítill, afgirtur með álveggjum og stórum timburpöllum, jatoba að fram og rásað lerki að aftan. Heitur pottur í bakgarði en fasteignamat eignarinnar er tæplega 110 milljónir en óskað er eftir tilboði í eignina.