Dortmund á enn möguleika á titlinum

Borussia Dortmund á enn möguleika á að vinna þýska meistaratitilinn í fótbolta en liðið vann stórsigur á Wolfsburg, 5-1, í dag.

Á sama tíma gerði Bayern München 1-1 jafntefli við Borussia Mönchengladbach á heimavelli.

Fimm stigum munar nú á liðunum þegar aðeins tvær umferðir eru eftir af deildinni. Bayern ætti þó að nægja eitt stig í viðbót til að tryggja sér þýska meistaratitilinn fjórða árið í röð þar sem markatala liðsins er mun betri en hjá Dortmund. Með sigri í næsta leik gegn Ingolstadt gulltryggir Bayern sér titilinn, burtséð frá því hvað Dortmund gerir gegn Frankfurt.

Thomas Müller kom Bayern yfir gegn Mönchengladbach á 6. mínútu en Andre Hahn jafnaði metin þegar 18 mínútur voru til leiksloka.

Pierre-Emerick Aubameyang skoraði tvö mörk fyrir Dortmund gegn Wolfsburg og þeir Shinji Kagawa, Adrian Ramos og Marco Reus sitt markið hver.

Úrslit dagsins:

Dortmund 5-1 Wolfsburg

Bayern 1-1 Mönchengladbach

Darmstadt 1-2 Frankfurt

Hannover 1-3 Schalke

Hoffenheim 2-1 Ingolstadt

Mainz 0-0 Hamburg