Brian Wilson flytur Pet Sounds í heild sinni

Einn áhrifamesti tónlistarmaður allra tíma, Brian Wilson, kemur til landsins 6. september og spilar meistaraverkið Pet Sounds í heild sinni í Eldborgarsal Hörpu í tilefni 50 ára afmælis plötunnar.

„Mér finnst alveg frábært að fá Brian Wilson til landsins. Hann er einn af þessum stóru í tónlistarsögunni, ef ekki bara einn sá stærsti. Þetta er 50 ára afmæli Pet Sounds, hann er að flytja plötuna í heild sinni af því tilefni og þetta er í síðasta sinn sem hann ætlar að gera það, þannig að þetta er sögulegur viðburður,“ segir Guðbjartur Finnbjörnsson, skipuleggjandi tónleikanna. „Það er alveg frábært að þetta verði í Eldborg. Þarna verða 11 manns á sviðinu og þetta er stórvaxið „production“ fyrir ekki stærri sal en Eldborg.“ Þetta tónleikaferðalag hans Brians er þegar hafið og hefur fengið ágætis dóma hjá gagnrýnendum.

En hvernig stendur á að Brian Wilson kemur til litla Íslands með svona stóra og merkilega tónleika? „Ég sá að hann var að túra með plötuna og hafði samband við þá úti og þeir voru ekkert alltof hressir, fannst þetta of lítill staður. En ég hef grun um að þetta hafi farið fyrir Brian Wilson, því að þegar ég hafði samband aftur var eins og það hefði komið skipun að ofan „við viljum fá Ísland inn í þetta“. Ég fékk á tilfinninguna að það væri vilji hjá honum og fólkinu í kringum hann til að koma til Íslands. Al Jardine og Blondie Chaplin, fyrrverandi Beach Boys-meðlimir, eru ekkert oft með honum en þeir koma báðir til Íslands sem þýðir að þeir hafa líka óskað sérstaklega eftir að vera með.“

Miðasalan hefst þriðjudaginn 26. apríl á harpa.is, tix.is og í síma 528 5050. Í boði verða VIP-miðar í mjög takmörkuðu magni og með kaupum á þeim fylgir möguleikinn á að fá að hitta Brian Wilson sjálfan.

Pet Sounds

Hljómplatan Pet Sounds er af mörgum talin eitt mesta meistaraverk tónlistarsögunnar og var t.d. valin 2. besta plata allra tíma af tónlistartímaritinu Rolling Stone. Þetta var 11. plata Beach Boys og nokkuð frábrugðin fyrri verkum sveitarinnar en Brian hafði tekið sér frí frá tónleikaferðalögum með hljómsveitinni til að einbeita sér að tónsmíðinni sem varð fyrir vikið bæði tilraunakenndari og persónulegri. Á plötunni var mikið unnið með metnaðarfulla röddun og alls kyns undarleg hljóðfæri eins og reiðhjólabjöllur, hundaflautur og Coca-Cola flöskur. Þrátt fyrir dræmar viðtökur í Bandaríkjunum hefur platan með tímanum hlotið mikið lof og hefur orðið mörgum merkustu tónlistarmönnum allra tíma innblástur í listsköpun sinni.