Jay Z brjálaður vegna Tidal: Sakar norska eigendur þess um að hafa svindlað á sér

Bandaríski rapparinn og tónlistarmógúllinn Jay Z er æfur út í norska fyrirtækið Schibsted sem seldi honum tónlistarveitunni Tidal fyrir rétt rúmi ári síðan. Hann segir að Norðmennirnir hafi gróflega ofmetið tölu áskrifenda þegar fyrirtækið var selt.

Hefur tónlistarveitan sent bréf til Schibsted þar sem því er haldið fram að fyrirtækið hafi sagt að Tidal hafi haft mun fleiri áskrifendur en raun bar vitni.

„Eftir að hafa skoðað málið höfum við komist að því áskrifendur að Tidal voru mun færri en þeir 540 þúsund sem norska fyrirtækið sagði að væru með áskrift að Tidal,“ segir í yfirlýsingu frá Tidal sem hefur hafið lögsókn á hendur Schibsted.

Norska fyrirtækið hafnar öllum ásökunum Tidal og segir þær ekki vera réttar. Rúmt ár er síðan Jay Z keypti Tidal fyrir 56 milljónir dollara sem nemur rúmum 7,6 milljörðum íslenskra króna.

Fyrirhugað var að veita Spotify, Apple og YouTube harða samkeppni og stóðu margir frægir tónlistarmenn að baki áætlunum Jay Z. Má þar nefna tónlistarfólk á borð við Kanye West, Rihönnu, Madonnu, Aliciu Keys, Beyoncé og Jack White ásamt hljómsveitunum Coldplay og Daft Punk.

Í dag eru um þrjár milljónir með áskrift af Tidal sem hefur þó mistekist að veita Spotify jafn harða samkeppni og vonir stóðu til en nú eru um þrjátíu milljón áskrifendur að þjónustu Spotify.