Leyniskyttur að störfum fyrir utan Stade de France á morgun

Yfirmaður umferðar- og almenningsöryggis í París staðfesti í dag að öryggisgæsla yrði hert fyrir æfingarleik Frakklands gegn Rússlandi á morgun.

Greindi Laurent Simonin frá því að leyniskyttur yrðu að störfum nálægt vellinum og á vellinum yrði sérstök öryggislögregla á meðan leikurinn færi fram.

Verður þetta  fyrsti leikur franska landsliðsins á heimavelli frá hryðjuverkaárásunum í París í nóvember þegar tveir menn frömdu sjálfsmorð með því að sprengja sig upp fyrir utan völlinn.

Sjá einnig:Forsætisráðherra Frakklands: EM verður haldið

Manuel Valls, forsætisráðherra Frakklandi, sagði á dögunum að EM myndi fara fram þar í landi í sumar þrátt fyrir hryðjuverkaárásirnar í París á síðasta ári og í Brussel í síðustu viku.