Zlatan: Að vinna Meistaradeildina var orðin þráhyggja en ég hef þroskast

Zlatan Ibrahimovic, leikmaður Paris Saint-Germain, verður í eldlínunni í kvöld þegar Frakklandsmeistaranir heimsækja Chelsea í seinni leik liðanna í 16 liða úrslitum Meistaradeildarinnar.

PSG vann fyrri leikinn, 2-1, og er í fínum málum fyrir þann síðari á Stamford Bridge, en sömu lið mættust á sama stað í keppninni í fyrra og þá fór franska liðið áfram.

Zlatan skoraði annað marka PSG í fyrri leiknum, en þessi 34 ára gamli Sví er búinn að spila frábærlega á tímabilinu. Hann er markahæstur í Frakklandi með 23 mörk og búinn að skora þrjú mörk í Meistaradeildinni.

„Ég er bara að hita upp. Ég trúi því ekki að ég nálgist enda ferilsins,“ sagði Svíinn á blaðamannafundi í gær. „Aldur er bara tala. Þetta snýst bara um hvernig þér líður og mér líður eins og ég sé ungur. Ég hef aldrei spilað betur en á þessu tímabili þegar horft er á tölfræðina.“

Zlatan hefur tólf sinnum á sínum ferli fagnað landstitli í fjórum löndum en aldrei unnið Meistaradeildina. „Þegar ég var ungur skipti Meistaradeildin mig öllu máli. Þetta jaðraði við þráhyggju. Síðan þroskaðist ég og fór að þekkja mig betur. Ég er reyndar erfiður maður að skilja,“ sagði Zlatan.

„Ég er búinn að átta mig á því að það breytir mér ekki sem leikmanni hvort ég vinni Meistaradeildina eða ekki. Það gerir mig ekki að betri leikmanni að vinna Meistaradeildina og ekki að verri leikmanni ef ég vinn hana ekki. Ég yrði samt mjög ánægður að vinna Meistaradeildina,“ sagði Zlatan Ibrahimovic.

Stutt myndband af blaðamannafundinum má sjá hér.