Landsmenn hvattir til að njóta helgarinnar því útlit er fyrir talsverða umhleypinga eftir helgi

Það verður fallegt veður yfir helgina en veðurfræðingur hjá Veðurstofa Íslands hvetur landsmenn til að njóta veðursins yfir helgina því eftir hana er útlit fyrir talsverða umhleypinga.

Í hugleiðingum Veðurfræðings, sem er að finna á vef Veðurstofu Íslands, kemur fram að í dag muni draga smám saman úr úrkomunni á austanverðu landi, en þó stinga sér niður él víða um landið, einkum við suður- og suðausturströndina í kvöld. Vindáttin verður norðaustlæg, hvassast verður við norðurströndina, 8 – 13 metrar á sekúndu.

Á morgun er svipað veður í kortunum en það heldur áfram að kólna og á sunnudag er útlit fyrir vetrarstillur og talsvert frost um allt land. Eftir helgina er útlit fyrir talsverðar umhleypingar, og strax á mánudag gengur nokkuð djúp lægð upp að landinu með hlýindum og talsverðri úrkomu. Það er því um að gera að njóta helgarinnar.

Veðurhorfur á landinu næstu daga:

Á sunnudag:

Fremur hæg breytileg átt og víða léttskýjað, en líkur á stöku éljum úti við sjóinn. Talsvert frost.

Á mánudag:

Ört vaxandi suðaustanátt með slyddu síðdegis en sunnan 15-25 m/s og rigning V-til um kvöldið. Suðaustan 8-13 m/s of úrkomulítið NA-til fram á kvöld. Hlýnandi veður, víða frostlaust um kvöldið.

Á þriðjudag:

Útlit fyrir suðlæga átt og talsverða rigningu eða snjókomu A-til á landinu en gengur í norðvestan hvassviðri og snjókomu V-til síðdegis en einnig A-til um kvöldið. Kólnar í veðri, frost um allt land undir kvöld.

Á miðvikudag:

Vestlæg átt, 5-10 m/s og stöku él en snjókoma með norðurströndinni. Frost 0 til 8 stig.

Á fimmtudag:

Breytileg átt, 3-10. Snjómugga á sunnanverðu landinu en annars úrkomulítið. Frost 2 til 10 stig.

Á föstudag:

SA-læg átt, 5-13. Snjókoma eða slydda sunnan- og vestanlands. Frostlaust með suðurströndinni en annars allt að 12 stiga frost.