Vinirnir koma saman á ný

Vinirnir sex, Rachel, Monica, Phoebe, Joey, Chandler og Ross, munu koma saman 21. febrúar næstkomandi í sjónvarpsþætti á NBC stöðinni. Því miður, fyrir aðdáendur þáttanna, stendur þó ekki til að gera nýja Friends þátt. Þetta kemur fram á vefsíðum The Independent og BuzzFeed.

Leikararnir munu koma saman til að heiðra leikstjórann James Burrows en hann leikstýrði meðal annars fimmtán þáttum af Friends. Á ferilskránni má einnig finna þætti af Cheers, Frasier, Will & Grace og Taxi.

„Ég vonast til þess að þau muni öll sex ná að koma í þáttinn en það getur margt enn farið úrskeiðis,“ segir Bob Greenblatt stjórnandi hjá NBC. Hann sagði að þau væru öll bókuð í þáttinn en það gæti gerst að eitthvert þeirra myndi hætta við.

Friends eru einhverjir vinsælustu sjónvarpsþættir sem gerðir hafa verið en þeir voru í loftinu á árunum 1994-2004. Reglulega skjótast upp á yfirborðið sögusagnir þess efnis að til standi að gera nýja þætti með persónunum úr þáttunum yfirleitt er blásið á þær sögusagnir jafnharðan. Það gæti því verið að þessi þáttur verði eins nálægt nýjum þætti og hægt er.