Kannast allir við það að gleyma sér

Hljómsveitin AmabAdamA er þessa dagana í stúdíói þar sem unnið er að því að taka upp nýja plötu sem stefnt er á að komi út á árinu.

„Við erum að byrja að taka upp nýja plötu. Lagið sem við erum að taka upp núna heitir Æjæjæjæj. Við frumfluttum það um verslunarmannahelgina. Núna langar okkur til þess að fara að gefa það út,“ segir Steinunn Jónsdóttir, önnur söngkona hljómsveitarinnar en sveitina skipa níu einstaklingar og forsprakkar hennar eru auk Steinunnar Magnús Jónsson, eða Gnúsi Yones og Salka Sól Eyfeld.

Síðasta smáskífan af nýju plötunni sem hljómsveitin sendi frá sér var lagið Óráð sem kom út í maí síðastliðnum. Lagið hlaut góðar viðtökur en það er eftir Gnúsa Yones og textinn ljóð eftir Davíð Stefánsson frá Fagraskógi.

Steinunn segir hljómsveitina að sjálfsögðu halda sig við sólskinsreggíið þó þau séu aðeins farin að gæla við döbbið. „Það er aðeins meira sólskin í sumum lögunum á meðan önnur eru kannski örlítið mystískari,“ segir hún og bætir við að nýja platan sé kannski örlítið meira bland en sú fyrri.

Þyrst í að spila

2015 var talsvert annasamt hjá hljómsveitinni sem spilaði mikið vítt og breitt um landið. „Það var mikið að gera út sumarið og við tókum meðvitaða ákvörðun um að draga okkur örlítið í hlé eftir verslunarmannahelgina til þess að hafa tíma til þess að hittast meira, semja og æfa upp eitthvað nýtt.“

Núna hefur sveitin fengið nægan tíma til að semja og æfa og kominn tími til skella sér aftur upp á svið. „Við erum orðin mjög þyrst í það að spila og það er aldrei að vita hvort við skellum í tónleika í bænum bráðum.“

Á næsta ári heldur AmabAdamA í sína fyrstu tónleikaferð til útlanda og mun meðal annars koma fram á tónleikahátíð á túrnum. „Við erum að fara að spila í útlöndum í fyrsta sinn og það er mjög spennandi. Ég fór með Reykjavíkurdætrum til Malmö í september og það var ný upplifun. Það er gaman að spila fyrir nýtt fólk á nýjum stað og svo er alltaf gaman að fara til útlanda,“ segir hún glöð í bragði.

Að sögn umboðsmanns hljómsveitarinnar, Sindra Ástmarssonar, munu tónleikar hljómsveitarinnar fara fram í Bretlandi, á Spáni og hugsanlega í Þýskalandi.

Fjallar um að gleyma sér

Nýja lagið er væntanlegt á öldur ljósvakans innan nokkurra vikna en það ber nafnið Æjæjæjæj. „Það fjallar um það þegar maður ætlar að fara að gera eitthvað en svo kemur eitthvað annað í staðinn sem fangar athygli manns og verður til þess að maður gleymir sér,“ segir Steinunn og bætir við að flestir geti sjálfsagt tengt við umfjöllunarefni lagsins.

„Til dæmis einhver fallegur maður eða falleg kona, eða bara Esjan eða sjórinn,“ segir hún hlæjandi og bætir við að hljómsveitarmeðlimir gætu sjálfsagt flokkast sem býsna gleymnir en áreitið sé líka meira en það var, þá sérstaklega með tilkomu snjallsíma.

„Í mínum hluta textans er ég að tala um þegar maður á kannski að skrifa ritgerð en bara gleymir sér aðeins og festist í tölvunni, fer út að skemmta sér eða fer jafnvel að vaska upp í staðinn fyrir að fara að læra,“ segir Steinunn kímin og auðheyrt er að hún kannast eitthvað við þær aðstæður sjálf.

„Magga texti fjallar til dæmis um þegar hann er að keyra og sér svo sæta stelpu að hann fer yfir á rauðu ljósi. Ég veit nú ekki alveg hvort það byggir á reynslu,“ segir Steinunn að lokum og skellir upp úr.