Sjö myndir sem þú þarft að sjá á Stockfish

Á kvikmyndahátíðinni Stockfish eru sýndar um þrjátíu kvikmyndir og það reynist mörgum erfitt að velja hvað skal sjá á þeim tíma sem hátíðin stendur.

Hér eru því nokkrar frábærar myndir sem við leyfum okkur að mæla með fyrir alla sem ætla að skella sér í gæðabíó á næstunni.

Hátíðin stendur frá 19. febrúar til 1. mars. Hægt er að skoða dagskránna nánar á heimasíðu Stockfish.

Sjá einnig: Kvikmyndasjóður er fjárfestingarsjóður

Blowfly Park - Flugnagarðurinn

Leikstjóri: Jens Östberg.

Gulldrengurinn Sverrir Guðnason leikur hér aðalhlutverkið í sænskum sálfræðitrylli sem jafnframt er opnunarmynd hátíðarinnar.

Wild Tales - Hefndarsögur

Leikstjóri: Damián Szifrón.

Tilnefnd til Óskarsverðlauna sem besta erlenda myndin og framleidd af Pedro Almodóvar.

Hefndarsögur sem eiga sér engan líka.

A Girl Walks Home Alone at Night - Einmana stúlka gengur heim um nótt

Leikstjóri: Ana Lily Amirpour.

Við erum stödd í Vonduborg sem er svarthvít og minnir að því leyti á bæði gamlar Jarmusch-myndir og Sin City.

Margverðlaunuð mynd um íranskar vampírur.

Black Coal, Thin Ice - Kolafarmur

Leikstjóri: Yi'nan Diao.

Frábær kínversk spennumynd sem vann Gullbjörninn í Berlín á síðasta ári.

Two Men in Town - Handan múranna

Leikstjóri: Rachid Bouchareb.

Hinn marg óskarstilnefndi fransk-alsírski leikstjóri Rachid Bouchareb er gestur hátíðarinnar. Hann teflir hér fram mynd með Forest Whitaker, Brenda Blethyn, Harvey Keitel og Ellen Burstyn í aðalhlutverkum.

The Trip to Italy - Ferðin til Ítalíu

Leikstjóri: Michael Winterbottom.

Bresku háðfuglarnir Steve Coogan og Rob Brydon þvældust um breska veitingastaði í The Trip.

Þeir endurtaka nú leikinn í bráðsmellinni mynd í leikstjórn Michaels Winterbottom.

Inner Scar - Hið innra ör

Leikstjóri: Phillippe Garrel.

Í þessari sérstæðu kult-mynd, sem tekin var upp á Íslandi, leikur sjálf Nico, ein goðsagnakenndasta söng- og leikkona sögunnar, aðalhlutverkið.

Ekki missa af uppgötvun úr fortíðinni á Stockfish.