Meira lagt upp úr menntaskólaárum

Fyrirtækið Sony Pictures ætlar að láta hinn næsta Pétur Parker eyða meiri tíma í menntaskólanum en hann gerði áður í þeim Spider-Man-myndum sem eru væntanlegar næstu árin.

Midtown-menntaskólinn hefur áður komið við sögu í myndunum um köngulóarmanninn en núna stendur til að leggja meira upp úr sambandi hans við aðra nemendur, á sama tíma og hann berst við glæpi annars staðar.

Menntaskólinn hefur einmitt haft mikið vægi í myndasögunum um Spider-Man.

Blaðið Variety greinir frá því að margir leikarar hafi verið nefndir til sögunnar sem arftakar Andrews Garfield í aðalhlutverkinu, en hann tók á sínum tíma við hlutverkinu af Tobey Maguire. Á meðal þeirra eru Dylan O´Brien úr The Maze Runner og Logan Lerman úr myndunum um Percy Jackson. Stutt er síðan Lerman lék í stríðsmyndinni Fury á móti Brad Pitt.

Einnig er ætlunin að ráða nýjan leikstjóra, en Marc Webb leikstýrði The Amazing Spider-Man og The Amazing Spider-Man 2. Sú síðarnefnda var verst sótt af þeim fimm Spider-Man-myndum sem Sony hefur framleitt. Þrátt fyrir það halaði hún inn 709 milljónum dala.

Vegna hins slaka gengis hefur verið ákveðið að Sony Pictures og Walt Disney muni starfa saman við gerð Spider-Man.

Samningurinn kveður á um að ofurhetjan gæti komið við sögu í væntanlegum Avengers-myndum. Líklegt er að hún komi fyrst við sögu í Captain America: Civil War sem kemur út á næsta ári en hún hefur hingað til aðeins verið hluti af Avengers-teiknimyndasögunum.

Fyrirtækið Marvel er í eigu Walt Disney. Marvel hefur lengi viljað setja köngulóarmanninn í myndirnar sínar en eftir að Sony eignaðist réttinn á Spider-Man árið 1999 hefur fyrirtækið ekki mátt snerta á ofurhetjunni. Því hefur það ekki mátt búa til kvikmyndir byggðar á ævintýrum Péturs Parker, fyrr en núna.