Garðar framlengir við ÍA

Garðar Gunnlaugsson, þriðji markahæsti leikmaður Pepsi-deildar karla í fótbolta í sumar, verður áfram í herbúðum Skagamanna. Þetta kemur fram í frétt á heimasíðu ÍA.

Garðar var með samning út næsta tímabil en nýr samningur gildir út keppnistímabilið 2017. Garðar skoraði 9 mörk í 17 leikjum í Pepsi-deildinni 2015 og fékk bronsskóinn.  Skagamaðurinn Garðar kom þar með  í veg fyrir að erlendir leikmenn fengu í fyrsta sinn gull, silfur og bronsskóinn á sama tímabili í efstu deild karla á Íslandi.

Garðar var sérstaklega mikilvægur ÍA liðinu í útileikjunum en hann skoraði 6 af 9 mörkum sínum í Pepsi-deildinni 2015 á útivelli en enginn annar leikmaður úrvalsdeildar karla skoraði fleiri mörk á útivöllum sumarið 2015.

Garðar skoraði þar með 43 prósent marka Skagaliðsins utan Akraness (6 af 14) og Garðar var með mark í fimm af sex útileikjum þar sem Skagaliðið náði í stig en þar á meðal var sigurmark á Leiknisvelli og mörk sem tryggðu ÍA jafntefli í Garðabænum og í Víkinni.

„Garðar er mikilvægur hlekkur í liðinu og ég er gríðarlega ánægður með að búið sé að tryggja krafta hans næstu tvö árin," sagði Gunnlaugur Jónsson, þjálfari meistaraflokks ÍA, í viðtali á heimasíðunni.

Garðar er 32 ára framherji sem hefur skorað 41 mark í 116 leikjum í úrvalsdeild karla. Hann hefur skorað 27 af þessum úrvalsdeildarmörkum sínum fyrir Skagamenn og gæti leikið sinn hundraðasta úrvalsdeildarleik fyrir ÍA á næstu leiktíð. Garðar er hefur spilað 89 leiki fyrir ÍA í efstu deild.