Emil fagnaði í kvöld

Hellas Verona er komið áfram í 16-liða úrslit ítölsku bikarkepppninnar eftir nauman 1-0 sigur á B-deildarliði Pavia í kvöld. Liðið mætir Napoli, toppliði úrvalsdeildarinnar, í næstu umferð.

Sjá einnig: Emil: Við erum í skítamálum

Sigurmarkið kom í uppbótartíma en þar var Claudio Winck að verki. Emil Hallfreðsson, sem hefur verið fastamaður í liði Hellas Verona, spilaði allan leikinn í kvöld.

Þetta var fyrsti leikur Hellas Verona undir stjórn nýs þjálfara en fyrr í vikunni tók Luigi Delneri við liðinu.

Sjá einnig: Nýi þjálfarinn hjá Verona talar vel um Emil

Skipt var um þjálfara eftir slæmt gengi liðsins í deildinni en liðið hefur ekki enn unnið sigur eftir fjórtán umferðir. Hellas Verona vermir nú botnsæti ítölsku deildarinnar og er einungis með sex stig.