Snjóflóðahætta víða um land

Veðurstofan hefur lýst yfir óvissustigi vegna snjóflóðahættu en mest er hættan á norðanverðum Vestfjörðum og utanverðum Tröllaskaga.

Víðast hvar á landinu er talsvert nýsvævi sem getur rokið af stað í vaxandi A-NA átt og getur snjósöfnun því verið mjög hröð í gil og fjallsbrúnir sem snúa undan vindi og er því hætta á snjóflóðum.

Á norðanverðum Vestfjörðum er mikil hætta á snjóflóðum en þar hefur nýsnævi skafið ofan á eldri snjó. Nokkuð skafrenningsfóður er til fjalla. Mikil snjósöfnun getur því orðið í hlíðum sem snúa undan vindi. Það dregur úr úrkomu á laugardagsmorgun en áfram veður stíf norðlæg átt fram á sunnudag.

Á utanverðum Tröllaskaga er einnig mikil hætta á snjóflóðum. Í kvöld spáir vaxandi NA-átt sem gæti orðið mjög hvöss á laugardagsmorgun með mikilli snjókomu og að vindur snúist í norðurátt.

Við þessar aðstæður getur snjósöfnun orðið mjög mikil í gil og fjallsbrúnir sem snúa undan vindinum og snjóflóð fallið fljótlega eftir að það tekur að hvessa. Ef veðurspá gengur eftir má búast við nokkuð stórum snjóflóðum á laugardag þar sem mesti snjórinn safnast fyrir. Búið er að loka Siglufjarðarvegi og Ólafsfjarðarmúla vegna snjóflóðahættu.

Einnig er töluverð hætta á snjóflóðum á Austfjörðum. Útlit er fyrir talsverða úrkomu á norðanverðum Austfjörðum. Snjósöfnun í gil og hlémegin í fjallsbrúnir getur orðið hröð í þessum aðstæðum og þá geta snjóflóð fallið.