Búið að opna vegi í flestum landshlutum

Greiðfært er orðið á helstu vegum á Suðurlandi og Vesturlandi. Þá eru vegir á Norðurlandi víða færir en hálka eða hálkublettir. Vegir á Vestfjörðum eru enn margir hverjir lokaðir sem og á hluta Austurlands. Fjallvegir inn til landsins eru meira og minna lokaðir.

Allir þjóðvegir voru lokaðir í gærkvöldi og nótt út af óveðrinu sem þá fór yfir landið en samkvæmt áætlunum Vegagerðarinnar átti að opna fyrstu vegi um klukkan 10 í morgun og fram til þrjú eftir hádegi.

Reykjanesbraut var opnuð snemma í morgun en var þó lokað aftur tímabundið út af umferðarslysi.