Tyrkir grönduðu rússneskri herflugvél

Tyrkneskar herþotur grönduðu í morgun rússneskri herflugvél sem flaug inn í lofthelgi Tyrklands. Tveir voru um borð í vélinni og virðast þeir hafa náð að skjóta sér út í fallhlífum. Sýrlenskar og rússneskar herþotur hafa athafnað sig á svæðinu nærri Tyrknesku landamærunum að Sýrlandi síðustu daga. Myndbönd eru tekin að birtast af því þegar vélin er skotin niður en óljóst er um afdrif flugmannanna. Tyrkir segjast ítrekað hafa varað flugmennina við og greint þeim frá að þeir væru í tyrkneskri lofthelgi. Rússar staðhæfa hinsvegar að vélin hafi verið innan sýrlensku landamæranna þegar hún var skotin niður.