Jón Daði: Gat verið afslappaður eftir að ég skrifaði undir hjá Kaiserslautern

Jón Daði Böðvarsson, landsliðsmaður í fótbolta, spilaði kveðjuleik sinn fyrir Viking á sunnudagskvöldið líkt og fyrirliðinn Indriði Sigurðsson. Íslenska tvíeykið kvaddi með 3-1 sigri á Mjöndalen.

„Það var gott að klára þetta með sigri og nú tekst ég á við ný verkefni með nýju félagi,“ sagði Jón Daði í viðtali í Akraborginni í gær, en hann heldur nú til þýska stórliðsins Kaiserslautern.

Sjá einnig:Selfoss verður af milljónum þar sem Jón Daði fer frítt

Jón Daði er sáttur við fyrstu þrjú árin sín í atvinnumennskunni og þakkar Viking fyrir góða tíma.

„Þetta var upp og niður. Þetta er minn fyrsti atvinnumannaklúbbur eftir að ég kom beint frá Selfossi 2013. Maður lærði alveg helling og er búinn að þroskast mikiðá stuttum tíma. Maður getur þakkað Viking fyrir að gera mig að betri leikmanni,“ sagði Jón Daði.

Hundfúll og reiður

Hann gengur nú brátt formlega í raðir Kaiserslautern sem spilar í þýsku 2. deildinni. Hann hefði getað hafið tímabilið með Kaiserslautern sem reyndi margsinnis að kaupa Jón Daða frá Viking.

Norska félagið var þó ekki á því að selja íslenska landsliðsmanninn. Það valdi frekar að halda Jóni Daða og reyna að komast í Evrópukeppni með hann innanborðs því á þeim tíma var liðið í Evrópubaráttu í deildinni og inn í bikarnum.

„Ég get alveg sagt að þessum tíma var ég hundfúll og reiður. Stjórnin og þeir vissu alveg af því. Þessi blessaði bolti er bara viðskipti og ég hafði engan annan kost en að halda áfram,“ sagði Jón Daði.

Fór ekki í fýlu

Það verður ekki annað sagt en ákvörðunin hafi verið hárrétt hjá Viking því Jón Daði fór á mikinn skrið og skoraði sex mörk og gaf sjö stoðsendingar í deild og bikar á seinni hluta tímabilsins.

„Maður varð bara að spýta í lófana og bretta upp ermarnar. Þetta var spurning um hvort maður ætti að vera í fýlu út í horni og spila illa eða hvort maður ætti að hífa sig upp og gera það besta úr þessu,“ sagði Jón Daði.

„Þetta var samt hundfúlt og langbest hefði verið fyrir mig að fara um mitt sumarið og fá undirbúningstímabil með Kaiserslautern en Viking hafnaði öllum tilboðunum.“

„Ég fór samt út og skrifaði undir. Það hjálpaði líka því þá var framtíðin komin í ljós og þá gat maður mætt afslappaður í leikina sem eftir voru,“ sagði Jón Daði.

Ekkert gefið í þessu

Hann verður löglegur með Kaiserslautern um áramótin en 2. deildin í Þýskalandi hefst aftur í febrúar eftir vetrarfrí. Hann er bjartsýnn á að fá að spila þar.

„Ég finn fyrir miklu trausti. Þjálfarinn er spenntur fyrir mér sem er mjög jákvætt. Ég reikna með að fá spiltíma en þetta er undir manni sjálfum komið eins og alltaf,“ sagði Jón Daði.

„Það er ekkert gefið í þessu. Maður mætir með það markmið að byrja eins marga leiki og maður getur og vonandi skora mörk og hjálpa liðinu. Vonandi helst maður svo heill fyrir þetta frábæra mót sem íslenska landsliðið er að fara í,“ sagði Jón Daði Böðvarsson.

Allt viðtalið má heyra í spilaranum hér að neðan.