Framhald Prometheus fær enn eitt nafnið

Það hefur margt gengið á við framleiðslu á framhaldi geimævintýris breska leikstjórans Ridley Scott, Prometheus.

Myndin bar fyrst vinnuheitið Prometheus 2, fékk síðar nafnið Alien: Paradise Lost en gengur nú undir nafninu Alien: Covenant (sáttmáli).

Sama hvaða nafn þessi framhaldsmynd fær þá mun hún fylgja eftir atburðunum sem áttu sér stað í Prometheus sem kom út árið 2012. Þar fengu áhorfendur að fylgjast með landkönnuðum ferðast til tunglsins LV-223 árið 2093 þar sem meiningin var að hitta þá sem einhverjir úr hópnum töldu hafa skapað mannkynið.

Sú ferð fór ekki eins og vonast hafði verið eftir, allir úr hópnum biðu bana nema vísindakonan Elizabeth Shaw og vélmennið David. Við lok myndarinnar sjá áhorfendur Elizabeth og David fljúga frá tunglinu og var stefnan sett á heimkynni þeirra sem taldir eru hafa skapað mannkynið og leita svara frá þeim hvers vegna þeir ákváðu að skapa mannkynið og hvers vegna þeir höfðu í framhaldinu tekið þá ákvörðun að eyða því.

Kvikmyndaverið 20th Century Fox segir Alien: Covenant eiga að vera mynd númer tvö í þríleik kvikmynda sem eiga að vera forsaga Alien-myndanna þar sem ætlunin er að svara hvers vegna skepnan, sem Ellen Ripley þurfti að kljást við í fjórum Alien-myndum, var sköpuð.

Neill Bloomkamp, sem á að baki District 9, Elysium og Chappie, átti að leikstýra næstu Alien-mynd en framleiðslu hennar hefur verið frestað um óákveðinn tíma, allavega þangað til Ridley Scott lýkur framleiðsu Alien: Covenant.

Myndin mun segja frá áhöfn skipsins Covenant sem uppgötvar plánetu sem hún telur í fyrstu vera einskonar paradís, en kemst síðar að því að plánetan er afar hættulegar staður með aðeins einum íbúa, vélmenninu David.