Damir áfram í Kópavogi

Miðvörðurinn Damir Muminovic verður áfram hjá Breiðabliki en hann hefur framlengt samning sinn við félagið til loka tímabilsins 2018. Þetta kemur fram á Blikar.is.

Damir var lykilmaður í vörn Breiðabliks í sumar en liðið fékk á sig aðeins þrettán mörk í 22 deildarleikjum í sumar. Blikar enduðu í öðru sæti deildarinnar, tveimur stigum á eftir FH.

Damir er uppalinn hjá HK en spilaði einnig með Leikni og Víkingi Ólafsvík áður en hann gekk í raðir Blika fyrir tímabilið 2014. Hann á alls að baki 157 deildar- og bikarleiki og ellefu mörk í þeim. Hann skoraði eitt mark í 21 deildarleik með Breiðabliki í sumar.

Þetta eru góð tíðindi fyrir vörn Breiðabliks sem gæti misst þá Kristin Jónsson og Oliver Sigurjónsson í atvinnumennsku í vetur.