App sem verðlaunar umhverfisvænni lífsstíl

The Changers CO2 fit appið gerir fyrirtækjum og bæjarfélögum kleift að hvetja starfsmenn eða íbúa sína til umhverfisvænni lífsstíls. Appið mælir kílómetra sem farnir eru með umhverfisvænum hætti og reiknar út hve mikið kolefni hafi verið sparað með því. Birna Guðmundsdóttir, starfsnemi hjá Chang­ers, segir í viðtali við Fréttablaðið að auðveldast sé að byrja á að mæla vegalengdir en svo muni tíminn leiða í ljós hvernig appið þróast.

Fyrirtæki eða bæjarfélög greiða fyrir appið og hvetja starfsmenn eða íbúa sína til að keppa sín á milli í því að spara sem mest kolefni. Svo er fólkið verðlaunuð þegar það hefur ferðast ákveðið langt gangandi, hjólandi eða með almenningssamgöngum. Meðal verðlauna er plöntun trjáa eða ókeypis máltíð í matsölu fyrirtækja. Síðan fyrirtæki fengu aðgang að appinu í ársbyrjun hafa notendur þess, meðal annars starfsmenn BMP og Ernst & Young, sparað milljón kíló af CO2 með því að nota umhverfisvænni samgöngur. Í staðinn hefur 1.463 trjám verið plantað í Þýskalandi. Markmið fyrirtækisins, að sögn Danielu Schiffer meðstofnanda þess, er að spara 100 milljón kíló árið 2016.

Appið er mest notað innan Þýskalands í dag en stefnir á alþjóðlega markaði. „Við lítum á okkur sem alþjóðlegt fyrirtæki sem er að takast á við alþjóðleg vandamál sem loftslagsbreytingar hafa í för með sér. Við viljum að þetta app hvetji fyrirtæki og starfsmenn þess til að gera eitthvað gott fyrir sig og umhverfi sitt. Við byrjuðum í Þýskalandi þar sem heimamarkaður okkar er þar. Til lengri tíma litið horfum við til Norður-Ameríku og sjáum appið sem notendavænt úti um allan heim. Það er nú þegar hægt að hlaða niður appinu í níutíu löndum,“ segir Schiffer.

Changers líta nú til Norðurlanda og er Birna að vinna að markaðssetningu appsins á þeim markaði. „Það er mjög áhugavert að einbeita sér að honum þar sem fólk er mjög meðvitað um áhrif loftslagsbreytinga í Skandinavíu,“ segir Birna. Í augnablikinu byggir appið á því hvernig hægt sé að spara kolefni í samgöngum, næsta skref verði hins vegar að mæla leiðir til að spara kolefni í matarneyslu og öðru. „Við skoðum þetta út frá samgöngum í dag þar sem snjallsímar gera okkur kleift að greina hreyfingarmynstur. Okkar næsta skref gæti verið matarneysla eða annað sem tengist kolefnislosun,“ segir Schiffer. Birna tekur undir með henni. „Tíminn verður bara að leiða ljós hvernig appið þróast,“ segir Birna að lokum.