Holyfield gjaldþrota eftir að hafa eytt 30 milljörðum króna

Þó svo Evander Holyfield hafi unnið sér inn 30 milljarða á hnefaleikaferlinum þá tókst honum að verða gjaldþrota.

Er Holyfield varð gjaldþrota fyrir þó nokkru síðan þurfti hann að selja allt sem hann átti. Hann byrjaði á að selja höllina sem hann bjó í en hún var ekki með nema 109 herbergjum. Einnig seldi hann beltin sín, hanska og sloppa.

Eitt af því sem sligaði Holyfield voru há meðlög. Hann á ellefu börn með sex konum og allar voru þær að fá há meðlög frá honum.

Til þess að halda sér gangandi hélt Holyfield áfram að boxa. Það var aðeins í fyrra sem hann lýsti því yfir að hann væri hættur. Þá var Holyfield 51 árs.

Hann er kominn með alls konar auglýsingasamninga í dag og hefur nóg að gera. Holyfield hefur lagt til hliðar allan biturleika yfir því sem klúðraðist og er farinn að brosa framan í heiminn á ný.

„Það þýðir ekkert að væla og velta sér upp úr því sem er búið. Mamma sagði alltaf við mig að það væru engar afsakanir," sagði Holyfield.