Stuðningsmenn City bauluðu aftur á Meistaradeildarlagið

Stuðningsmenn Man. City ætla ekki að hlusta á Geir Þorsteinsson og aðra hjá UEFA því þeir héldu áfram að baula á Meistaradeildarlagið í gær.

Eins og kunnugt er þá hefur UEFA kært félagið þar sem stuðningsmenn þess bauluðu á lagið um daginn. Geir Þorsteinsson, formaður KSÍ, var eftirlitsmaður UEFA á þeim leik og klagaði stuðningsmennina til City.

City var að leika í Sevilla í gær og þeir stuðningsmenn City sem þangað fóru létu í sér heyra er Meistaradeildarlagið var spilað. Það sem meira er þá voru þeir mættir með miða þar sem á stóð: „BOO".

Stjóri Man. City, Manuel Pellegrini, hefur tekið upp hanskann fyrir stuðningsmennina sem og fyrirliði liðsins, Vincent Kompany, sem sagði þessa kæru Geirs vera brandara.