Fyrsti dagur vetrar mun bera nafn með rentu

Fyrsti dagur vetrar er á laugardag og ber nafn með rentu því komandi helgi má búast við norðan átt og kulda um allt land. Gerir Veðurstofa Íslands ráð fyrir frosti víðast hvar á landinu og snjókomu á norðanverðu landinu en bjartviðri syðra.

Fram eftir vikunni verður lægðagangur og mun hitinn hanga yfir frostmarki. Miðvikudagskvöld og aðfaranótt fimmtudags er þó búist við því að það muni kólna heldur þegar norðlægar áttir gera vart við sig. Einhver óvissa er þó með þessa spárnar, hvenær það mun nákvæmlega kólna, en öllum ber þeim þó saman um að næstu helgi verði orðið kalt á landinu öllu, víðast hvar frost.

Á norðanverðu landinu má búast við hvítri jörð í byggð en íbúar á sunnanverðu landinu eru taldir sleppa við það, þó svo að ekki sé hægt að slá því föstu að svo stöddu.

Textaspá Veðurstofu Íslands:

Á miðvikudag:

Minnkandi norðanátt og kólnandi veður. Norðan 5-13 m/s þegar líður á morguninn. Rigning á láglendi N-til og slydda til fjalla en bjartviðri sunnan jökla. Þykknar upp SA-lands síðdegis og stöku skúrir en él um landið N-vert. Hiti 1 til 7 stig, mildast syðst.

Á fimmtudag:

Breytilegt átt, 3-8 m/s. Skýjað um allt land og stöku skúrir SA-til en él á Vestfjörðum. Vaxandi suðlæg átt og rigning um landið sunnan og vestanvert síðdegis en áfram þurrt NA-lands. Hiti um frostmark, en að 5 stigum syðst.

Á föstudag:

Suðlæg átt, 5-13 m/s. Skúrir sunnan og suðvestantil en slydduél eða él á Vestfjörðum. Bjartviðri um landið norðan og austanvert. Norðlæg átt og bætir í ofankomu NV-til um kvöldið. Hiti um og undir frostmarki.

Á laugardag og sunnudag:

Útlit fyrir hvassa norðanátt með snjókomu norðan og austanlands en bjartviðri sunnan og vestanlands. Frost um mest allt land.