Gjafir og góðvild bárust ekki systkinum

Hjá Útlendingastofnun vinna starfsmenn nú að því að koma öllum þeim börnum sem eru með stöðu hælisleitenda í skóla. Þau voru sautján en fækkaði í fjórtán þegar systkinin Janie, Petrit og Laura Telati fengu skólavist í Laugalækjar- og Laugarnesskóla í gær og hefja skólagöngu sína hér á landi innan fárra daga. Systkinin búa í göngufæri við skólana og litu inn í Laugalækjarskóla á þriðjudag. Þar hittu þau fyrir Björn M. Björgvinsson, skólastjóra skólans, sem tók vinsamlega á móti þeim. Þau skoðuðu skólann og voru forvitin um margt sem var ólíkt með honum og skóla þeirra í heimalandinu, Albaníu. 



Björn segir aðeins eiga eftir að ganga frá nokkrum formsatriðum áður en skólaganga systranna hefst. „Útlendingastofnun tók sér nokkra mánuði í að sækja um skólavist fyrir þær en við þurfum örfáa daga til þess að undirbúa þær fyrir skólann,“ segir hann og segir skólann munu taka vel á móti þeim.

Skólastjóri Laugarnesskóla segir sér hafa verið brugðið við fréttir af börnunum og hlakkar til að hitta Petrit. „Ég hrökk upp við fréttir af þessum börnum,“ segir Sigríður Heiða Bragadóttir og segist hafa tekið við þó nokkrum börnum án kennitölu í skólann. Það þyki ekkert tiltökumál og því hafi hún undrast að Útlendingastofnun hafi dregið lappirnar.

Börnin eiga lítið til skólagöngunnar og búa í nánast tómri íbúð. Fjölmargir höfðu samband við fréttastofu í gær og óskuðu eftir að koma til þeirra fatnaði, ritföngum, skólatöskum, tölvum og fleiru. Þeim var vísað á Rauða krossinn í Hafnarfirði sem sér um félagsleg verkefni vegna hælisleitenda. Hafnarfjarðardeildinni bárust svo mörg símtöl að þar fór starfið úr skorðum og brugðið var á það ráð að biðja fólk sem vill gefa fjölskyldunni gjafir að senda tölvupóst á netfangið hafnarfjordur@redcross.is.

Engar gjafir bárust systkinunum í gær þrátt fyrir gjafmildi fjölda Íslendinga. Frá Rauða krossinum fengust þau svör að það væri vegna þess að fyrst þyrfti að fara fram þarfagreining á því hvað þau vantar.

„Við erum hrærð yfir gjafmildi fólks. Starfsfólk Hafnarfjarðardeildar ætlar að koma gjöfum áleiðis til þeirra strax á morgun,“ segir Björn Teitsson, upplýsingafulltrúi Rauða krossins. Hann segir gjafmildina einnig munu nýtast öðrum fjölskyldum í sömu stöðu. „Það geta ekki allir komið fram í fjölmiðlum, sumir eru í afar viðkvæmri stöðu hér á landi en í jafn mikilli þörf fyrir aðstoð.“

Þrjú börn til viðbótar fengu samþykki um skólavist í Reykjavík og tvö börn bíða samþykktar. „Það eru tólf börn búsett í Hafnarfjarðarbæ en eru í þjónustu Útlendingastofnunar. Það standa yfir viðræður við Hafnarfjarðarbæ um hvernig staðið verði að skólagöngu þeirra, þannig að það er verið að vinna að því að koma málunum í samt lag,“ segir Skúli Á. Sigurðsson, verkefnastjóri hælissviðs hjá Útlendingastofnun.

Í Reykjavíkurborg er tekið við kennitölulausum börnum í alla grunnskóla og er það samkvæmt mannréttindastefnu borgarinnar. Sú hefur hins vegar ekki alltaf verið raunin með börn á leikskólaaldri, en í nóvember í fyrra varð sú breyting að öll börn ættu rétt á að ganga í leikskóla, með kennitölu eða ekki. Það kom til kasta umboðsmanns borgarbúa í þeim efnum sem bárust tilkynningar um aðgengi og aðgengishindranir þess hóps barna, sem ekki hafa fengið úthlutað kennitölu eða eru skráð utangarðs í þjóðskrá, að leikskólaþjónustu.

Foreldrar barnanna biðu eftir dvalarleyfi eða hæli hér á landi. Í tilefni af þessu ritaði umboðsmaður skóla- og frístundaráði Reykjavíkurborgar bréf vegna aðstæðna þessara barna og var brugðist skjótt við. Í dag eru sjö börn á leikskólaaldri í Reykjavík án kennitölu og fjögur þeirra komin í leikskóla. Skólavist þriggja leikskólabarna er í ferli hjá borginni.