Ríkislögreglustjóri telur aukinn straum flóttamanna til Íslands ekki ógna almannaöryggi

Kerfislægar breytingar þarf til á starfsemi lögreglunnar á Suðurnesjum eigi embættið að geta brugðist við fjölgun hælisleitenda og flugfarþega á komandi mánuðum. Ekki verður séð að móttaka aukin straums flóttamanna feli í sér áhættu hvað almannaöryggi og öryggi íslenska ríkisins varðar.

Þetta eru meðal helstu niðurstaðna skýrslu greiningardeildar ríkislögreglustjóra um þróun á landamærum Íslands vegna aukin straums flóttamanna hingað til lands á næstu mánuðum. Skýrslan var unnin að beiðni embættis lögreglustjórans á Suðurnesjum.

Í skýrslunni er gert ráð fyrir því að hælisleitendum fjölgi á Íslandi næsta árið og að búast megi við auknu álagi á landamæravörslu á Keflavíkurflugvelli vegna þess. Álagið muni gera lögreglu erfiðara fyrir að halda uppi hefðbundnu eftirliti og þjónustu.

„Hvað hælisleitendur varðar er vandinn gagnvart lögreglu og samfélaginu, að mati lögreglunnar á Suðurnesjum, fólginn í því að straumnum fylgi brotastarfsemi eins og málin sanni,“ segir meðal annars í skýrslunni.

„Ekki sé einvörðungu um mögulega brotamenn að ræða heldur einnig möguleg fórnarlömb, semsagt mansals ... Að mati lögreglunnar á Suðurnesjum er lögreglan í landinu ekki í stakk búin til að sinna þessum málaflokki eins og þyrfti.“

Ólíklegt að hryðjuverkamenn leynist í hópi hælisleitenda

Varðandi öryggismál tengd fjölgun hælisleitenda hér á landi segir í skýrslunni að þó aldrei verði útilokað að glæpamenn leynist í hópi flóttamanna sé almennt engin ógn talin stafa af flóttafólki. Bent er á að hryðjuverkamenn eigi þegar greiða leið inn í Evrópu sem ferðamenn á fölsuðum vegabréfum og því sé ólíklegt að þeir kjósi að leggja á sig erfitt og hættulegt ferðalag dulbúnir sem flóttamenn.

„Fimm til sex þúsund Evrópumenn eru eða hafa verið í Sýrlandi og sífellt bætist í hópinn,“ er í skýrslunni haft eftir Claude Moniquet, forstöðumanni Upplýsinga- og öryggismiðstöðvar Evrópu. (e. European Strategic Intelligence and Security Center)„Vandséð er því hver ávinningur Íslamska ríkisins væri að flytja út Sýrlendinga eða Íraka, fólk sem talar arabísku, þekkir aðstæður í Írak og Sýrlandi og samtökin þarfnast í stríðsrekstri sínum í þessum löndum.“