Illugi vildi ekki svara af eða á um meint lán frá Orku Energy

Illugi Gunnarsson vildi ekki svara spurningum blaðamanna Fréttablaðsins um meint þriggja milljóna króna lán sem Stundin hefur heimildir fyrir að ráðherrann hafi þegið frá Orku Energy.

Illugi var í Föstudagsviðtali Fréttablaðsins í dag þar sem hann sagðist ekki ætla að opna heimabanka sinn fyrir blaðamönnum, og lét einnig hafa eftir sér.

„Ég ítreka það að um mig hljóta að gilda sömu reglur og um aðra stjórnmálamenn. Hvaða upplýsingar eigum við að gefa, til fjölmiðla, til þingsins? Ég skorast ekkert undan því að gefa slíkar upplýsingar en ég vil heldur ekki að það gildi einhverjar sérstakar reglur um mig þannig að menn geti farið dýpra ofan í mín persónulegu mál en annarra.“