Stelpurnar í Rósagarðinum töpuðu í toppslag

Sara Björk Gunnarsdóttir var í byrjunarliði Rosengård að vanda þegar liðið tapaði fyrir Linköpings, 2-1, í 9. umferð sænsku úrvalsdeildar kvenna í fótbolta í kvöld.

Markalaust var í hálfleik en Natasa Andonova kom meisturum Rosengård yfir með marki á 49. mínútu, 1-0.

Þannig stóðu leikar fram á 87. mínútu þegar Claudia Neto jafnaði metin fyrir Linköpings, 1-1, og heimakonur tryggðu sér svo sigurinn með marki Mariann Gajhede Knudsen í uppbótartíma, 2-1.

Með sigrinum jafnaði Linköpings topplið Rosengård að stigum, en þau eru bæði með 22 stig, stigi á undan Eskilstuna United.

Sara Björk spilaði allan leikinn fyrir Rosengård.