Hafdís: Með tárin í augunum eftir langstökkið

Hafdís Sigurðardóttir, UFA, vann sigur í langstökki og 100 metra hlaupi kvenna á innan við fimm mínútum á 89. Meistaramóti Íslands í frjálsíþróttum sem nú stendur yfir í Kópavogi.

Hafdís stökk lengst 6,39 metra en náði ekki að bæta Íslandsmetið sitt, en hún fór svo beint í 100 metra hlaupið og vann það örugglega.

"Ég var ekki ósátt með lengdina," segir hún um langstökkið. "Ég var ósátt við að tvö lengstu stökkin mín voru hárfínt ógild. Það var svekkjandi því það voru stökk þar sem ég bætti minn besta árangur. Ég á það þá bara inni."

"Ég fór að fíla mig betur í seinni hlutanum í langstökkskeppninni og fór þá að stökkva aðeins betur. Þetta var mjög fínt. Ég er mjög ánægð með seríuna í rauninni en akkúrat núna er ég ekkert sátt," segir þessi mikla keppnismanneskja sem vildi bæta metið.

"Ég ætlaði í fyrsta lagi að bæta Íslandsmetið mitt og allt umfram það hefði verið plús."

Hafdís hljóp beint úr sandgryfjunni, nánast enn með sand á afturendanum, beint í 100 metra hlaupið þar sem hún vann öruggan sigur þrátt fyrir litla sem enga upphitun.

"Ég fékk eitt upphitunarstart en svo þurfti ég bara að gjöra svo vel og hlaupa. Maður gerir það bara. Það er allt í góðu lagi og ég er sátt með gullið," segir hún.

"Það er ekki gott að fá engan undirbúning fyrir úrslit í 100 metra hlaupi. Það er ekki gott fyrir hausinn og ég var nánast með tárin í augunum eftir langstökkið þannig það var erfitt að gíra sig upp í 100 metrana," segir Hafdís Sigurðardóttir.