Útfærslan gekk ekki upp

Anítu Hinriksdóttur, hlaupakonu úr ÍR, tókst ekki að verja Evrópumeistaratitilinn í 800 metra hlaupi sem hún vann fyrir tveimur árum á EM U-19 ára í Eskilstuna í Svíþjóð um helgina.

Aníta komst örugglega í úrslit í 800 metra hlaupinu en hún var með besta tíma allra keppenda í undanrásunum; 2:05,01 mínútur. Aníta byrjaði úrslitahlaupið ágætlega. Hún leiddi eftir fyrri hringinn á millitímanum 1:00,64 mínútum og var enn með forystu eftir 600 metra.

En Aníta gaf eftir á lokasprettinum og missti Renée Eykens frá Belgíu og Söruh Schmidt frá Þýskalandi fram úr sér. Aníta endaði að lokum í 3. sæti en hún kom í mark á tímanum 2:05,04 mínútum sem er talsvert frá hennar besta tíma (2:00,49 mínútur). Bronsið var því niðurstaðan og önnur verðlaun Anítu á EM U-19 ára staðreynd.

Niðurstaðan viss vonbrigði

Gunnar Páll Jóakimsson, þjálfari Anítu, segir það smá vonbrigði að hafa ekki náð að verja titilinn sem Aníta vann svo glæsilega fyrir tveimur árum.

„Auðvitað eru bronsverðlaun mikil viðurkenning og allt það en það er engin launung að það eru viss vonbrigði að hafa ekki náð að vinna hlaupið,“ sagði Gunnar í samtali við Fréttablaðið skömmu eftir úrslitahlaupið.

Aðspurður hvort úrslitahlaupið í ár hafi verið sterkara en fyrir tveimur árum hafði Gunnar þetta að segja: „Það var kannski aðeins meiri breidd í þessu hlaupi. Þessi sem vann hlaupið (Renée Eykens) vann einnig mótið í Mannheim um daginn og við vissum að Aníta væri að etja kappi við stelpur sem eru sterkar í taktísku hlaupi eins og úrslitahlaupið endaði með að vera.“

Mótið í Mannheim (Bauhaus Junioren Gala) sem Gunnar vísar til fór fram fyrir þremur vikum. Þar náði Aníta mjög góðu hlaupi og kom í mark á 2:02,57 mínútum, aðeins tveimur hundraðshlutum úr sekúndu á eftir Eykens sem hafði svo aftur betur gegn Anítu á EM um helgina.

Vildi keyra upp hraðann

Að sögn Gunnars var markmiðið á laugardaginn að hlaupa hratt hlaup ef svo má að orði komast: „Það var talsverður vindur og í þannig aðstæðum þarf að taka ákvörðun hvort á að hlaupa á tiltölulega rólegum hraða og eiga nóg eftir fyrir endasprettinn eða hlaupa hratt hlaup,“ sagði Gunnar, en Eykens og Schmidt völdu fyrri kostinn.

„Anítu langaði í hratt hlaup og okkur fannst hún vera tilbúin í það, bæði eftir mótið í Mannheim, æfingar þar á eftir og hlaupið í undanrásunum,“ bætti Gunnar við. Þótt Aníta hafi verið fyrst eftir fyrri hringinn var millitíminn ekki eins og góður og vanalega og það gerði keppinautum hennar auðveldara fyrir.

„Hún ætlaði sér að hlaupa fyrri hringinn mjög hratt og láta hinar þurfa að ákveða hvort þær ætluðu að fylgja henni á þeim hraða, sem þær hefðu átt erfitt með því þær eiga ekki eins góðan tíma,“ sagði Gunnar og bætti við:

„Mér fannst hún aðeins hikandi milli 200 og 400 metranna og hún keyrði ekki eins og við vorum búin að tala um, eflaust út af vindinum. Það þýddi að hinar náðu að hlaupa fyrri hringinn á tíma sem þær ráða vel við. Þannig að við verðum að viðurkenna að útfærslan á hlaupinu gekk ekki upp.“

Gunnar segir ekki hægt að bera úrslitahlaupið í Eskilstuna saman við úrslitahlaupið á EM innanhúss í Prag í mars en þar keppti Aníta á móti fullorðnum keppendum. Hún hafi hlaupið mun betur þá og var auk þess að etja kappi við miklu sterkari andstæðinga.

Gunnar segir frekar hægt að líkja hlaupinu í fyrradag við úrslitahlaupið á Smáþjóðaleikunum í síðasta mánuði, þar sem Aníta endaði í 2. sæti eftir að hafa verið með forystuna lengi framan af.

Erfiðara að verja titil

Aníta átti einstakt ár 2013 þegar hún vann bæði til gullverðlauna á HM og EM ungmenna og var auk þess kjörin vonarstjarna ársins. Gunnar segir alltaf erfitt að fylgja eftir slíkum árangri.

„Hún kom auðvitað gríðarlega mikið á óvart fyrir tveimur árum. En það er erfiðara að verja titil en að ná honum óvænt eins og hún gerði 2013. Það gekk allt upp þá en það reynir kannski fyrst á fólk þegar það gengur ekki allt upp,“ sagði Gunnar, sem hefur fulla trú á að Aníta komi sterkari til baka.

Aníta, sem er 19 ára, er á síðasta ári í unglingaflokki en EM í Eskilstuna var líklega hennar síðasta mót í þeim flokki. En hvað tekur nú við hjá þessari efnilegu íþróttakonu?

„Nú förum við bara að leita að mótum, ekkert alltof sterkum en það þarf þó að vera með öflugum keppinautum. Og þá erum við að tala um keppendur sem hafa hlaupið á undir tveimur mínútum,“ sagði Gunnar en Aníta verður að sjálfsögðu í eldlínunni um næstu helgi þegar Meistaramót Íslands í frjálsum íþróttum fer fram.