Stór hluti mun ekki draga uppsagnir til baka

Að minnsta kosti 170 hjúkrunarfræðingar hafa sagt starfi sínu lausu á Landspítalanum. Hjúkrunarfræðingar segja fulla alvöru að baki uppsögnunum og að stór hluti muni ekki draga þær til baka þrátt fyrir að samningar náist. Þær muni hafa meiri áhrif á heilbrigðiskerfið en verkfallið hafði nokkurn tímann.

Meðal þeirra sem hafa sagt starfi sínu lausu eru þær Rósa Einarsdóttir, hjúkrunarfræðingur á bráðalyflækningasviði Landspítalans, og Guðrún Ösp Theodórsdóttir, hjúkrunarfræðingur á bráðamóttöku á Heilbrigðisstofnun Suðurnesja.

„Það gerði útslagið þegar það voru sett lög á okkur,“ segir Rósa. „Mér fannst það vera niðurlægjandi, það er ekki á okkur hlustað, það er gert lítið úr okkur og mér finnst okkur stillt upp við vegg.“

Sjá einnig: „Ég held að þetta sé versta drulla sem ég hef fengið yfir mig!“

„Ég er búin að vera að berjast í átta ár í þessu heilbrigðiskerfi og ég get ekki framfleytt börnunum mínum ein og ég ætla bara að finna mér vinnu þar sem ég get gert það,“ segir Guðrún.

Rósa er með norskt hjúkrunarleyfi og reiknar með að fara til Noregs. Hún tekur þó fram að hún vilji starfa hér á landi og tekur Guðrún undir þetta.

„Ég er búin að sækja um fjögur störf hér á landi og er að sækja um norsk hjúkrunarleyfi,“ segir Guðrún.

Mun segja upp 1. júlí

Helga María Guðmundsdóttir, hjúkrunarfræðingur á slysa- og bráðadeild Landspítalans, hefur ekki sagt starfi sínu lausu en kemur til með að gera það 1. júlí næstkomandi ef ekki verður búið að semja í deilunni. Hún er einnig búin að sækja um norskt hjúkrunarleyfi.

Veistu um marga sem eru í þinni stöðu: Er misboðið með stöðuna og eru að íhuga uppsögn?

„Já, ég veit um mjög marga. Mjög margir tilbúnir með bréfið í vasanum,“ segir Helga.

Sjá einnig: Órói og óvissa á gjörgæsludeild: Mest þurft að kalla út ellefu manns á einum degi

Þær segja allar að það sé full alvara á bakvið uppsagnir hjúkrunarfræðinga.

„Ef þessir hjúkrunarfræðingar segja upp, sem eru búnir að gera það, þá mun það hafa gríðarleg áhrif og mun meiri áhrif heldur en verkfallið hafði,“ segir Helga.

Stór hluti mun ekki draga uppsagnir til baka

Áttu von á því að stór hluti þessara hjúkrunarfræðinga muni draga uppsagnir sínar til baka ef samningar nást fyrir 1. júlí?

„Einhverjir munu gera það, en það er nú þegar stór hluti hjúkrunarfræðinga sem ætlar ekki að gera það og það er bara alveg rosalegt,“ segir Rósa. „Við erum strax búin að missa stóran hluta af hjúkrunarfræðingum. Við erum kannski búin að missa einhverja tugi hjúkrunarfræðinga. Það er alveg sama hvað verður samið um, þeir eru bara farnir.“

Guðrún segir að léleg launakjör sé ekki eina ástæðan að baki uppsögnum hjúkrunarfræðinga. Vinnuaðstaðan og tækjabúnaður hafi einnig áhrif.

„Við erum öll að vinna á við þrjá,“ segir Guðrún. „Í minni vinnu get ég ekki orðið lasin. Ég sendi börnin mín veik í skólann og bíð bara eftir að það sé hringt í mig frá kennaranum. Ég lenti inn á spítala um daginn og var beðinn um að taka vaktina daginn eftir.“