Sumarlífið: Endaði með því að fá sér tattoo í miðju viðtali við Gísla Pálma

Ný vefþáttur hefur göngu sína hér á Lífinu á Vísi á morgun en hann verður í umsjón Davíðs Arnars Oddgeirssonar og Óskar Gunnarsdóttur. Þátturinn mun bera nafnið Sumarlífið og ætla þau Davíð og Ósk að vera viðstödd alla helstu viðburði sumarsins.

„Við ætlum kíkja á alla heitustu viðburðina tengda tónlistar- og menningarlífi í sumar. Fólk vill sjá lifandi myndir og hefur gaman af því að innbyrða fréttina á formi myndbands,“ segir Ósk Gunnarsdóttir. 

Í þættinum á morgun verður rætt við rapparann Gísla Pálma en útgáfutónleikar hans verða í Gamla Bíói í kvöld. Lífið fylgir Gísla Pálma eftir í kvöld og verða þau Davíð og Ósk á staðnum.

Í gær tóku þau upp viðtal við GP en það endaði með því að Ósk fékk sér húðflúr í miðju viðtali.

„Hann var sjálfur á leiðinni í tattoo og manaði mig að taka viðtalið við sig á meðan ég væri sjálf í stólnum,“ segir Ósk.

„Hann spurði mig hvort ég væri ekki grjóthörð, og ég gat ekki skorast undan. Áður en ég vissi af var ég komin í tattoo.“

Hér að neðan má sjá hvernig hlutirnir þróuðust á tattoo-stofunni Reykjavík Ink í gær.