Kobe hættir eftir næsta tímabil

Framkvæmdastjóri LA Lakers, Mitch Kupchak, sagði í kvöld að Kobe Bryant ætli að leggja skóna á hilluna eftir næsta tímabil í NBA-deildinni.

„Hann er búinn að segja þetta við mig," sagði Kupchak við fjölmiðlamenn.

„Það er ekkert búið að ræða þetta annars neitt sérstaklega og ég býst ekki við því að það verði þannig. Þetta er búið næsta sumar."

Kobe á eitt ár eftir af samningi sínum við Lakers og hann verður orðinn 37 ára gamall næsta sumar. Næsta tímabil verður hans tuttugasta í deildinni.

Hann verður launahæsti leikmaður deildarinnar á kveðjutímabilinu en þá mun hann fá 3,3 milljarða króna í árslaun.