Duncan nýtur þess meir að spila þessa dagana

Tim Duncan er kannski nýorðinn 39 ára gamall en hann er samt enn einn af öflugustu leikmönnum NBA-deildarinnar.

Hann er búinn að spila átján tímabil í NBA-deildinni á glæstum ferli. Duncan er enn í stuði með San Antonio Spurs og var með tvöfalda tvennu í síðasta leik. Hann segist njóta þess að spila.

„Ég geri mér grein fyrir því að minn tími er senn á enda og því nýt ég þess enn meira að spila núna," sagði Duncan.

Framhaldið er óljóst hjá honum en samningur hans við Spurs rennur út í sumar.

Spurs getur komist áfram í úrslitakeppninni í nótt er liðið spilar við LA Clippers. Leikurinn hefst klukkan 1.30 og er í beinni á Stöð 2 Sport.