Góð byrjun hjá Kristianstads | Guðný Björk skoraði sigurmarkið

Fjórir Íslendingar voru í byrjunarliði Kristianstads sem vann 1-0 sigur á Umeå í fyrstu umferð sænsku úrvalsdeildarinnar í fótbolta í dag.

Guðný Björk Óðinsdóttir skoraði eina mark leiksins á 61. mínútu en auk hennar voru Ásgerður Stefanía Baldursdóttir og Margrét Lára og Elísa Viðarsdætur í byrjunarliði Kristianstads í dag. Þjálfari liðsins er Elísabet Gunnarsdóttir.

Guðný Björk, Margrét Lára og Ásgerður voru allar teknar af velli í seinni hálfleik.

Þetta var fyrsti leikur Ásgerðar í sænsku deildinni en hún er á láni hjá Kristianstads frá Íslands- og bikarmeisturum Stjörnunnar.

Þetta var einnig fyrsti leikur Margrétar í sænsku deildinni síðan 20. október 2013, en sá leikur var einmitt gegn Umeå.

Sif Atladóttir lék ekki með Kristianstads en hún eignaðist sitt fyrsta barn í síðustu viku.