Íslenska íshokkílandsliðið á uppleið | Fyrsti leikurinn í kvöld

Íslenska landsliðið í íshokkí spilar í kvöld sinn fyrsta leik í A-riðli 2. deildar á heimsmeistaramóti karla en mótið fer fram í Skautahöllinni í Laugardal dagana 13. til 19. apríl.

Íslenska liðið mætir Belgum klukkan 20.00 í kvöld en á næstu dögum munu strákarnir síðan spila við Rúmeníu, Serbíu, Ástralíu og Spán. Það er búist við góðri mætingu og stemmningu á fyrsta leiknum í kvöld en margir spenntir að sjá íslenska liðið.

Það er nefnilega mikil bjartsýni í herbúðum íslenska liðsins en íslenska landsliðið í íshokkí hefur bætt árangur sinn jafnt og þétt á heimsmeistaramótum á undanförnum árum.

Það hefur því mikið breyst frá því að liðið byrjaði í neðstu deild á sínu fyrsta móti. Íslenska liðið endaði þá í 9.sæti, sem var jafnframt neðsta sætið í riðlinum.

Árið 2006 vann íslenska liðið sig upp úr 3.deild.  Allt fram á tímabilið 2010-11 voru  tveir jafnsterkir sex liða riðlar í 2. deild. IIHF tók þá hinsvegar upp nýtt kerfi og nú er riðlunum raðað eftir styrkleika, þ.e. vinna þarf B riðil til að komast upp í A riðil.

Íslenska liðið hefur smátt og smátt unnið sig upp riðla og deildir og á síðasta tímabili náðist besti árangur íslenska  liðsins þegar það vann  til silfurverðlauna í A.riðli 2.deildar sem fram fór í Belgrad í Serbíu.

Tvær landsliðsbúðir voru haldnar á tímabilinu á Íslandi og um páskana hélt liðið til Furudals í Svíþjóð þar sem æft var í fjóra daga ásamt því að spilaðir voru tveir æfingaleikir við lið sem var samansett af sterkum leikmönnum úr nágrenni Furudals.



Íslenska hópinn skipa 22 leikmenn þ.e. 12 framherjar, 8 varnarmenn og 2 markmenn. Einn nýliði er í hópnum, Steindór Ingason. Fyrirliði liðsins er Ingvar Þór Jónsson en aðstoðarfyrirliðar þeir Emil Alengaard og Jón Benedikt Gíslason. Þjálfari liðsins er Tim Brithén en honum til aðstoðar er Gunnlaugar Björnsson.

Landslið Íslands á heimsmeistaramót í íshokkí á Íslandi:

Framherjar

Emil Alengard

Jón Gíslason

Robin Hedström

Björn Róbert Sigurðarson

Jóhann Már Leifsson

Egill Þormóðsson

Jónas Breki Magnússon

Brynjar Bergmann

Úlfar Andrésson

Arnþór Bjarnason

Pétur Maack

Andri Már Mikaelsson

Varnarmenn

Ingvar Þór Jónsson

Andri Helgason

Björn Már Jakobsson

Ingólfur Elíasson

Birkir Árnason

Orri Blöndal

Steindór Ingason

Ingþór Árnason

Markmenn

Snorri Sigurbergsson

Dennis Hedström

Dagskrá mótsins er eftirfarandi:

13. apríl

13:00 Spánn - Ástralía

16:30 Serbía - Rúmenía

20:00 Ísland - Belgía

14. apríl

13:00 Rúmenía - Ástralía

16:30 Belgía - Spánn

20:00 Ísland - Serbía

16. apríl

13:00 Rúmenía - Belgía

16:30 Serbía - Ástralía

20:00 Ísland - Spánn

17. apríl

13:00 Belgía - Serbía

16:30 Spánn - Rúmenía

20:00 Ástralía - Ísland

19. apríl

13:00 Serbía - Spánn

16:30 Ástralía - Belgía

20:00 Rúmenía - Ísland