Balotelli þarf brauð og vatn til að skora en ekki Ferrari

Massimo Ferrero, hinn bráðskemmtilegi forseti Sampdoria í ítölsku A-deildinn í fótbolta, segir Mario Balotelli þurfa temja sér lágstemmdari lífstíls ætli hann að byrja að skora aftur.

Balotelli hefur átt erfiða daga á Anfield og aðeins skorað fjögur mörk í 25 leikjum fyrir Liverpool síðan hann gekk í raðir liðsins frá AC Milan síðasta sumar.

Hann hefur fengið ævintýralegan skammt af gagnrýni; bæði fyrir að skora ekkert og svo fyrir framlag sitt á vellinum sem er ekki mikið.

„Ég myndi semja við hann,“ sagði Ferrero í viðtali við Gazzetta TV, þegar Balotelli barst í tal.

„Ef hann kæmi til Sampdoria yrði hann aftur góður. Hér myndi enginn rífast í honum ef hann myndi ekki skora. Hann hefði bara hægt um sig og væri ánægður.“

„Að mínu mati er hann bara ekki lengur hungraður enda fær hann fjórar milljónir evra á ári,“ sagði Ferrero, en hann vill að Balotelli byrji að keyra um á Bianchina-bíl, smábíl sem vinsæll var á sjöunda áratugnum.

„Við myndum bara gefa honum brauð, vatn og Bianchina frekar en Ferrari. Þá er ég viss um að hann fari að skora aftur,“ sagði Massimo Ferrero.