Texti um umskorinn lítinn svartan Sambó í söngbók leikskólabarna

Vísir hefur undir höndum allsérstæða söngbók, sem ætluð er til stuðnings leikskólakennurum þegar þeir velja lög fyrir leiksskólabörnin til söngs. Söngbókina mátti finna á eldri gerð heimasíðu leiksskólans Vesturberg í Reykjanesbæ, sem skipt var út fyrir skömmu. Þar kennir ýmissa grasa og ekkert endilega hefðbundin leikskólalög sem eru í þeirri samantekt; þarna eru lag eftir Megas: Spáðu í mig og Þykkvabæjarbragur Árna Johnsen, svo dæmi séu nefnd.

Þarna koma þeir með hnífinn ryðgaðan og bitlausan

En, það sem vekur mesta athygli er bragurinn Zulu, sem er texti sem menn sannarlega hefðu tæplega búist við því að finna í söngbók sem vistuð er á síðu leikskóla og hugsuð sem undirstöðurit þegar söngdagskráin er sett saman.

Ég heiti Sambó og ég er Zulu,

umskera þeir mig í kvöld.

Ég skal þó játa, ég er ei spenntur,

þeir hafa aldrei heyrt um deyfingar hér.

Því ég er Zulu gæji af versta tagi

sem á að umskera í kvöld. (x2)

Ég kann að búa til hús úr mykju

en aldrei komist kvenmann upp á.

Ég hef drepið flóðhest og fíla

en aldrei hef ég dottið í það.

Því ég er Zulu gæji af versta tagi

sem á að umskera í kvöld. (x2)

Þarna koma þeir með hnífinn,

ryðgaðan og bitlausan.

Ég vild‘ég væri fullur að flaka

suður við Súgandafjörð.

Vísi er ekki kunnugt um hvaða lag er notað við þennan umbúðalausa og sérstæða brag.

Söngheftið aðeins ætlað leiksskólakennurum

Vísir setti sig í samband við Brynju Aðalbergsdóttur en hún er leikskólastjóri Vesturbergs. Hún sagðist miður sín yfir textanum í söngbókinni, þegar Vísir innti hana eftir því hvernig það mætti vera að Zulu-sönginn væri þar að finna. Hún sjálf hafði aldrei rekið augu í þennan brag og hún fullyrðir að það hafi aldrei verið sungið í leikskólanum.

Brynja gerir sér enga grein fyrir tilurð þessa. Hún telur líklegast að textinn hafi slysast inn í bókina, sem unnin var með „copy/paste“ úr annarri söngbók. Og það sé býsna langt síðan hún var tekin saman. Að minnsta kosti 10-15 ár. Þá segir Brynja leikskólabörnin aldrei hafa fengið þessa bók í hendurnar, hún hafi verið ætluð starfsfólkinu sem velji lögin sem sungin eru hverju sinni.

Söngbókin var aðgengileg öllum á heimasíðu leikskólans, áður en skipt var um heimasíðu.