Gera ráð fyrir seinkunum hjá Strætó

Farþegar mega búast við að ferðir Strætó verði felldar niður eða seinki mikið í dag og jafnvel fram á kvöld. Þetta kemur fram í tilkynningu frá fyrirtækinu.

Afar vont veður fer nú yfir landið en eins og Vísir hefur greint frá í dag hefur það mikil áhrif á samgöngur.

„Bæði er átt við höfuðborgarsvæðið og landsbyggðina, í aðstæðum sem þessum er öryggi sett umfram tímaáætlun. Farþegar eru vinsamlegast beðnir um að fylgjast með heimasíðu Strætó og veðurfréttum,“ segir í tilkynningunni.

Uppfært 17.15:

Tilkynning hefur borist frá Strætó: „Enn eru seinkanir miklar vegna veðurs og færðar. Seinkanirnar eiga bæði við um Akstursþjónustu fatlaðs fólks og Strætisvagna. Það ættu allir að komast heim en ekki á réttum tíma, öryggi er sett umfram tímaáætlun í þessum aðstæðum.  Allt kapp er lagt á að koma farþegum heim eins fljótt og kostur er.“