Stormviðvörun: Allt að 25 metrar á sekúndu framundan

Veðurstofan hefur gefið út stormviðvörun en búist er við meira en 20 metrum á sekúndu sunnanlands síðdegis í dag og víðar um land í nótt og fram á mánudagsmorgun. Veðrið á þó að vera mun skaplegra en landsmenn fengu að kynnast í gær.

„Það er ekkert í líkingu við það sem var í gær,“ segir Björn Sævar Einarsson, veðurfræðingur á vakt Veðurstofu Íslands. „Það er vaxandi austanátt með slyddu eða rigningu núna eftir hádegi og það verður austan 15-23 metrar á sekúndu núna undir kvöld.“

„Hvassast verður hér sunnanlands og það verður líklega talsverð rigning á sunnanverðu landinu, einkum suð-austanlands,“ segir Björn. „Síðan snýst hann í sunnanátt í kvöld og nótt og má búast við að það verði sunnan 18-25 metrar á sekúndu allra vestast seint í nótt en mun hægari austantil.“

Björn segir að það muni lægja verulega með morgninum og að draga muni úr rigningu.