Leverkusen skellti Atlético | Sjáðu markið

Bayer Leverkusen kom skemmtilega á óvart í kvöld með því að vinna 1-0 sigur á Atletico Madrid í fyrri leik liðanna í sextán liða úrslitum Meistaradeildarinnar.

Atletico náði ekki að skora mikilvægt útivallarmark og Leverkusen fer því með fína stöðu til Spánar.

Þeir sem áttu von á því að Atletico myndi hafa það náðugt í dag höfðu rangt fyrir sér. Heimamenn seldu sig dýrt, fengu færi en náðu ekki að skora frekar en Atletico í fyrri hálfleik.

Þeir héldu þó áfram að sækja í síðari hálfleik og uppskáru á 57. mínútu. Þá skoraði Hakan Calhanoglu afar mikilvægt mark.

Markið af dýrari gerðinni líka. Frábært samspil og skotið klárað með föstu skoti upp í þaknetið.

Mikill hiti var í mönnum og fast tekist á það sem eftir lifði leiks en mörkin urðu ekki fleiri.

Sigurmarkið má sjá hér að ofan.

Frábært skot hjá Leverkusen í slána. Ótrúleg markvarsla hjá markverði Leverkusen.