Ásynjur Íslandsmeistarar níunda árið í röð

SA Ásynjur tryggðu sér Íslandsmeistaratitilinn í íshokkí kvenna í gær eftir 4-1 sigur á Birninum öðrum leik úrslitaeinvígisins sem var spilaður í Egilshöllinni.

Hin fimmtán ára Silvía Rán Björgvinsdóttir skoraði tvö mörk fyrir SA í leiknum en hin mörkin skoruðu þær Jónína Guðbjartsdóttir og Sunna Björgvinsdóttir.

Silvía Rán Björgvinsdóttir skoraði fjögur mörk í 9-1 sigri SA í fyrsta leiknum og var því með sex mörk í tveimur leikjum úrslitaeinvígisins.

Ásynja hafa borið höfuð og herðar yfir önnur lið í vetur en þær fóru taplausar í gegnum allt tímabilið og unnu úrslitaeinvígið samtals 13-2.

Þetta er níunda árið í röð sem Skautafélag Akureyrar verður Íslandsmeistari kvenna í íshokkí og liðið hefur alls unnið fjórtán af sextán Íslandsmeistaratitlum frá upphafi.

Mörk/stoðsendingar SA í úrslitaeinvíginu:

Silvía Rán Björgvinsdóttir 6/2

Linda Brá Sveinsdóttir 2/0

Birna Baldursdóttir 1/1

Guðrún Blöndal 1/2

Katrín Ryan 1/0

Jónína M. Guðbjartsdóttir 1/3

Sunna Björgvinsdóttir 1/0

Eva María Karvelsdóttir 0/2