Kemur til skoðunar hvort Sigurður verði sviptur fálkaorðunni

Guðni Ágústsson segir orðunefnd koma saman á næstunni og þá verði það rætt hvort til greina komi að svipta Sigurð Einarsson, fyrrverandi stjórnarformanni Kaupþings, rétti til að bera fálkaorðuna.

Forseti Íslands, Ólafur Ragnar Grímsson, sæmdi Sigurð fálkorðunni í ársbyrjun árið 2007 en Sigurður var í gær dæmdur til fjögurra ára fangelsisvistar í Hæstarétti Íslands fyrir sinn hlut í Al Thani-málinu svokallaða. Í þrettándu grein forsetabréfs um fálkaorðuna kemur fram að stórmeistari, sem er forseti Íslands, geti að ráði orðunefndar svipt hvern þann sem hlotið hefur orðuna en síðar gerst sekur um misferli, rétti til að bera hana.

Deilir aldrei við dómarann

Guðni Ágústsson segir að athygli hans hafi verið vakin á þessu ákvæði.

„Þannig að ég hef ekkert um þetta að segja annað en að þegar orðunefnd kemur saman á næstunni þá munum við fara yfir þetta mál og hefur það komið upp áður og hver voru viðbrögðin þá og hvað beri að gera í þessu. Það er bara einfalt af minni hálfu, ég get ekkert annað sagt en að við munum fara yfir þetta,“ segir Guðni.

Hann vildi lítið tjá sig um dóm Hæstaréttar í Al Thani-málinu í gær.

„Ég deili aldrei við dómarann. Þeir hafa komist að þessari niðurstöðu og ég trúi þeim.“

Sigurður talinn meðal helstu samstarfsmanna forseta

Ólafur Ragnar og Sigurður Einarsson áttu í ágætis samstarfi fyrir hrun ef marka má rannsóknarskýrslu Alþingis um aðdraganda og orsakir falls íslensku bankanna árið 2008. Í skýrslunni er meðal annars tekið dæmi úr bókinni Sögur af forseta en þar segir að Sigurður Einarsson hafi verið tíður gestur á Bessastöðum og sama megi segja um forráðamenn annarra banka.

Sérstaklega er tekið fram að frá árinu 2000 hefði Ólafur Ragnar unnið með Sigurði Einarssyni að mörgum málum, bæði í þágu bankans og annarra málefna.

„Má telja Sigurð meðal helstu samstarfsmanna forsetans á síðari árum,“ segir í skýrslunni.

Þá er rifjað upp að árið 2004 fóru íslensku bankarnir mikinn í kaupum á bönkum víða um heim.

„Mikið lá við og bað Sigurður Einarsson forsetann um aðstoð. Forsetinn brást vel við og bauð tveimur stjórnendum Singer & Friedlander sem voru að kanna trúverðugleika Kaupþings í hádegisverð á Bessastöðum til að sannfæra þá um ágæti bankans,“ segir í skýrslunni um Sigurð og Ólaf Ragnar.

Skrifaði bréf í þágu Sigurðar

Í skýrslunni er einnig rifjað upp að árið 2008 skrifaði Ólafur Ragnar bréf í þágu Sigurðar Einarssonar sem Ólafur vísaði meðal annars til sem vinar síns. Eitt bréf sem er rifjað upp í skýrslunni var ritað 22. maí var til emírsins Hamads Bin Khalifa Al Thani í Katar en Ólafur ritaði það í þágu Sigurðar. Hamad er bróðir Mohammads Bin Khalifa Al-Thani sem keypti hlut í Kaupþingi fyrir 25,7 milljarða króna með láni frá bankanum þann 22. september árið 2008 en dómur féll vegna þeirra viðskipta í Hæstarétti í gær þar sem Sigurður var dæmdur til fjögurra ára fangelsisvistar.